މިހާރު ކުރިއަށްދާ 6 ވަނަ ކެރަމް ވަރލްޑް ކަޕުގެ ޓީމު އިވެންޓުގައި ރާއްޖޭގެ ގައުމީ ފިރިހެން ޓީމާއި އަންހެން ޓީމުން ތިންވަނަ ހޯދައިފިއެވެ.

މި މުބާރާތް ކުރިއަށްދަނީ އެމެރިކާގެ ކެލިފޯނިއާގައި މި ނޮވެމްބަރ މަހުގެ 11 އިން 17 ވަނަ ދުވަހުގެ ނިޔަލަށެވެ.

މިއީ އެމެރިކާގެ ކެރަމް އެސޯސިއޭޝަން (ޔޫއެސްސީއޭ) ގެ އިސްނެގުމުގެ މަތިން، އިންޓަރނޭޝަނަލް ކެރަމް ފެޑެރޭޝަން (އައިސީއެފް) އާ ގުޅިގެން ބާއްވާ މުބާރާތެކެވެ.

މި މުބާރާތުން ރާއްޖޭގެ ފިރިހެން ޓީމު ލޯ މެޑެލް ހޯދީ ސިންގަޕޫރު ބަލިކުރުމަށްފަހުއެވެ. މި ޓީމުގައި ހިމެނެނީ އިސްމާޢީލް އަޒްމީން، އިބްރާހީމް ހުޖާން އަލީ، ހަސަން ނާޒިމް، މުޙައްމަދު މުންތަސިރު އަދި ޚާތިމް ޚަލީލެވެ.

ރާއްޖޭގެ ގައުމީ އަންހެން ކެރަމް ޓީމު ލޯ މެޑެލް ހޯދީ މުބާރާތް ބާއްވާ ގައުމު ކަމަށްވާ އެމެރިކާ ބަލިކުރުމަށްފަހުއެވެ. މި ޓީމުގައި ހިމެނެނީ އައިމިނަތު ވިދާދު، އައިޝަތު ނަހުފާ، އައިޝަތު ފައިނާޒް، ފާތިމަތު ރަޔާނާ އަދި އައިމިނަތު ޝުބާ އާދަމެވެ.

މިއަހަރުގެ ކެރަމް ވަރލްޑް ކަޕުގައި ވެސް އޯޕަން ސިންގަލްސް، އޯޕަން ޑަބަލްސްގެ އިތުރުން ޓީމު އިވެންޓް އަދި ސްވިސް އިވެންޓް ކުޅުމަށް ވަނީ ހަމަޖެހިފައެވެ. އަދި ޔޫއެސް އޯޕަން އިންވިޓޭޝަނަލް މުބާރާތް ވެސް ކުޅުމަށް ވަނީ ހަމަޖެހިފައެވެ.

ކެރަމް ވަރލްޑް ކަޕުގައި ވާދަކޮށް ރާއްޖޭގެ ފިރިހެން އަދި އަންހެން ޓީމަށް ލޯ މެޑެލް ހޯދިއިރު، މިދިޔަ އޭޕްރީލް މަހު މާލޭގައި ބޭއްވި ހަވަނަ އޭޝިއަން ކެރަމް ޗެމްޕިއަންޝިޕުންވެސް އަންހެން ޓީމު ވަނީ ލޯ މެޑެލް ހޯދާފައެވެ. އަދި އެ މުބާރާތުގައި ރާއްޖޭގެ ފިރިހެން ޓީމު ވަނީ ރިހި މެޑެލް ހޯދާފައެވެ.