ރާއްޖޭގައި ޑޮަލަރު ނުލިބުމުގެ ވާހަކައަކީ އަބަދު ވެސް ދައްކަމުން އަންނަ، ހުއްޓުމެއް ނެތް ވާހަކައެކެވެ. އަދި ބޭންކު ރޭޓަށްވުރެ އެތައގުނަ ބޮޑު އަގުގައި 'ކަޅުބާޒާރު' ގައި ޑޮަލަރު ވިއްކާ ކަމީ އެންމެންނަށް ވެސް އެނގޭ ބޮޑުސިއްރެކެވެ.

މިކަމަށް ހައްލު ގެނެސްދީ، ރައްޔިތުންނަށް ތަސައްލީއެއް ހޯދައިދިނުމުގެ މަސައްކަތް ރައީސް ޑރ. މުޙައްމަދު މުޢިއްޒު ފެއްޓެވުމުން އެކަމަށް ހިޔާލުތަފާތުވާ މީހުން ވެސް އުޅެއެވެ. ހިޔާލަކީ ތަފާފު އެއްޗަކަށްވާތީއެވެ.

އެހެންނަމަވެސް އެމަނިކުފާނުގެ މި ނިންމެވުމަށް ތާއީދުކުރާ ރައްޔިތުންގެ އަދަދު ގިނައެވެ. އަދި ރައީސްގެ އެ ނިންމެވުމަށް ގިނަބަޔަކު ދަނީ ތާއީދު ވެސް ކުރަމުންނެވެ.

އެގޮތުން މީސްމީޑިއާގައި ބައެއް ފަރާތްތަކުން ފާޅުކުރަމުންދާ ހިޔާލުތަކަށް ބަލާއިރު، އެކަމުގެ ހެޔޮ ބަދަލުތައް ފެންނާނެކަމަށް ގަބޫލުކުރާ މީހުން ގިނައެވެ. އަދި ކުރީގެ ސަރުކާރުތަކުން މިކަމަށް ހައްލެއް ހޯދުމަށް އިހުމާލުވެފައިވާކަމަށް ބުނެ، ފާޑުކިޔުން ވެސް އަމާޒުކުރެއެވެ.

ގިނަ ބަޔަކު ބުނާގޮތުގައި މިއީ ވިޔަފާރިވެރިންނަށް ގެއްލުމެއް ކުރިމަތިވާނެ ބަދަލެއް ނޫނެވެ. އެއީ މި ގަވާއިދުގެ ދަށުން ހަމައެކަނި ކުރާކަމަކީ ބޭންކުތަކަށް ފައިސާ މާރުކުރުން ކަމަށްވާތީއެވެ. އަދި އެއީ ބޭންކުތަކަށް އިތުރަށް ފައިސާ ދޭންޖެހޭ ކަމެއް ނޫންކަމަށް ވެސް ވާތީއެވެ.

މިއީ ޑޮލަރުގެ ކަޅު ބާޒާރުތަކުގެ ދޮރުތަށް ބަންދުވެގެންދާނެ ކަމެއްގެ ގޮތުގައި ސިފަކުރާއިރު، މި ބަދަލުގެ ސަބަބުން ގެއްލުންވާނީ ޒަމާންތަކެއް ވަންދެން އެ ވިޔަފާރިން ނަފާ ހޯދަމުންދިނަ ފަރާތްތަކަށެވެ.

ރާއްޖެއަށް ކުރިމަތިވެފައިވާ އެންމެ ބޮޑު އެއް މައްސަލައަކީ ޑޮލަރުގެ ތާށިކަން ކަމުގައިވާއިރު، ރައީސްގެ މި ނިންމެވުމުގެ ސަބަބުން ޑޮލަރުން އާމްދަނީ ލިބޭ މަހުޖަނުންގެ ކިބައިން ރައްޔިތުން ސަލާމަތްވާނެ ކަމަށް ވެސް ގިނަބަޔަކުބުނެއެވެ.

އާއްމު ރައްޔިތުން ބޮޑު އަގުގައި ކަޅު ބާޒާރުން ޑޮލަރު ގަންނަން ޖެހުމަކީ ދެކޮޅު ޖެހޭ ކަމެއް ނޫން ކަމަށް ދެކެވަޑައިގެން، އެކަމަށް އިންސާފު ހޯދައިދިނުމުގެ މަސައްކަތް ފެއްޓެވީ ރައީސް ޑރ. މުޢިއްޒުއެވެ.

ރައީސުލްޖުމްހޫރިއްޔާގެ ރިޔާސީ ވައުދުފުޅުތައް ފުއްދަވަމުންގެންދަވާއިރު، ޑޮލަރާއި ގުޅޭގޮތުން ވެވަޑައިގެންނެވި ވައުދުފުއްދެވުމުގެ މަސައްކަތް މިހާރު ވަނީ ފައްޓަވާފައެވެ.

މިގޮތުން ރާއްޖޭގައި ޢަމަލުކުރަމުންދާ ބޭރު ފައިސާގެ ގަވާއިދަށް ވަނީ މުހިއްމު ބަދަލުތަކެއް ގެންނަވައި، އެ ބަދަލުތަކާއެކު ރާއްޖެއަށް އެންމެ ގިނައިން ބޭރު ފައިސާ ލިބޭ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް ލިބޭ އާމްދަނީ ރާއްޖޭގެ ބޭންކުތަކަށް ޖަމާކުރަން ވަނީ މަޖުބޫރުކޮށްފައެވެ.

އެމްއެމްއޭއިން އަލަށް ޢަމަލުކުރަން ފެށި ބޭރުފައިސާ ގަނެ ވިއްކުމުގެ ވިޔަފާރިއާ ބެހޭ ގަވާއިދަކީ 1987 އިން ފެށީގެން ޢަމަލުކުރަމުން އައި ގަވާއިދުގެ ބަދަލުގައި ޢަމަލުކުރަން ފެށި އައު ގަވާއިދެކެވެ. މި ގަވާއިދުގެ އެންމެ ބޮޑު ބޭނުމަކީ ބޭރުފައިސާ ގަނެވިއްކުމުގެ ވިޔަފާރި ބެލެހެއްޓުން މިހާރަށްވުރެ ހަރުދަނާކޮށް އެ ވިޔަފާރި ހިންގުމުގައި ޒަމާނީ އުސޫލުތަކެއް ކަނޑައެޅުމެވެ.

އައު ގަވާއިދުގެ ދަށުން ފަތުރުވެރިކަމުގެ ހިދުމަތްދޭ ތަންތަން ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ކޮންމެ ފަތުރުވެރިއަކަށް ކަނޑައެޅޭ ވަކި މިންވަރަކަށް ބޭރު ފައިސާ ބޭންކިންގ ނިޒާމުގެ ތެރެއަށް މާރުކުރުމަށް ގަވާއިދުގައި ވަނީ ހިމަނާފައެވެ.

މި ބަދަލުތަކަކީ ދިވެހި އާއްމު ރައްޔިތުންނަށް ގިނަ ލުއިތަކެއް ލިބިގެންދާނެ ބަދަލުތަކަކަށްވާއިރު، ކުރިމަގުގައި ބޭންކުތަކުން ފަސޭހައިން ޑޮލަރު ލިބޭނެ މަގު ވެސް ތަނަވަސްވާނެއެވެ. އަދި އެއަރޕޯޓުގައި ފޮރިން އެކްސްޗޭންޖު ކައުންޓަރުތައް ބަހައްޓާ ޑޮލަރު ހޯދުމުގެ ފަސޭހަ އިންތިޒާމްތައް ހަމަޖެއްސުމަށް ވެސް މިއީ މުހިއްމު ބަދަލެކެވެ.