ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީގެ ހިންގުންތެރިކަމަށް ބައިނަަލްއަގްވާމީ އެވޯޑެއް ލިބިއްޖެއެވެ.

މެލޭޝިއާގެ މޯސް ގްރޫޕުން އިންތިޒާމްކޮށްގެން ދޭ އޭޝިއާގެ މޯސްޓް އިންސްޕަޔަރިންގ އެގްޒެކެޓިވްސްގެ އެވޯޑު އެމަނިކުފާނަށް ލިބިވަޑައިގަތީ ސްޓެލްކޯގެ އެމްޑީގެ ހައިސިއްޔަތުން ކުންފުންޏާއި އެނަރޖީ ސެކްޓަރގެ ކުރިއެރުމަށް ކޮށްދެއްވަމުން ގެންދަވާ މަސައްކަތްތަކާ ގުޅިގެންނެވެ.

މީގެއިތުރުން "އިންޑަސްޓްރީ ޗެމްޕިއަން އޮފް ދަ އިޔަރ" ގެ އެވޯޑު ވަނީ ސްޓެލްކޯ އަށް ލިބިފައެވެ.

އެމްޑީ ފަހުމީ ސްޓެލްކޯއާއި ގުޅިވަޑައިގަތީ 1998 ވަނަ އަހަރު އެކައުންޓް އެސިސްޓެންޓް ޓްރެއިނީއެއްގެ ވަޒީފާއިންނެވެ.

އީސްޓް ލަންޑަން ޔުނިވަރސިޓީން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ހާސިލްކުރައްވައި، ޔުނިވަރސިޓީ އޮފް އަބާޑީން އިން އެކައުންޓިންގ ދާއިރާ އިން މާސްޓަރސް ހާސިލުކުރައްވާފައިވާ ފަހުމީ ވަނީ ސްޓެލްކޯގެ ބައެއް އެހެންމަގާމުތައް ވެސް ފުރުއްވާފައެވެ.

އެގޮތުން ޕްރޮކިއުމަންޓް ޑިޕާޓްމަންޓުގެ ހެޑުކަމާއި، ބިޒްނަސް ޑިވެލޮޕްމަންޓް ޑިޕާޓްމަންޓުގެ ހެޑުކަމާއި ކަސްޓަމަރ ސަރވިސް އާއި ބިލިންގ ޑިޕާޓްމަންޓުގެ ހެޑުކަން ވަނީ ކުރައްވާފައެވެ.

މިއީ އޭޝިއާގެ މޯސްޓް އިންސްޕަޔަރިންގ އެގްޒެކެޓިވްސް އެވޯޑް ދިވެއްސަކަށް ލިބުނު ދެވަނަ ފަހަރެވެ. މި އެވޯޑު މީގެކުރިން ލިބިފައިވަނީ އެމްޑީޕީ ސަރުކާރުގައި ސްޓެލްކޯގެ މެނޭޖިންގ ޑިރެކްޓަރުގެ މަގާމު އަދާކުރެއްވި ހަސަން މުޣުނީއަށެވެ.