ހުޅުމާލޭ ހޮސްޕިޓަލްގެ އިމަރޖެންސީ ރޫމް ބޮޑުކުރުމަށް ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ.

މި މަަސައްކަތް އެ ކުންފުންޏާ ހަވާލުކުރުމަށް ހުޅުމާލެ ހޮސްޕިޓަލުގައި ބޭއްވި ރަސްމިއްޔާތުގައި އެ ހޮސްޕިޓަލުގެ އެއްބަސްވުމުގައި ސޮއިކުރެއްވީ މާލެ ގުރޫފް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމްއެވެ. އާރްޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ބްރިގޭޑިއަރ ޖެނެރަލް ރިޓަޔަރޑް އަލީ ޒުހައިރެވެ.

ހުޅުމާލޭ ހޮސްޕިޓަލުގެ އިމަރޖެންސީ ރޫމް ބޮޑުކުރުމުގެ މަސައްކަތް އާރްޑީސީ އާ ހަވާލުކުރީ ދެ މަސް ދުވަހުގެ ތެރޭގައި ނިންމާ ގޮތަށެވެ.

މި އެއްބަސްވުމުގެ ދަށުން އެ ހޮސްޕިޓަލުގައި މިހާރު ހުރި 7 އެނދުގެ އިމަރޖެންސީ ރޫމް، ޒަމާނީ ވަސީލަތްތަކާއެކު 14 އެނދަށް ބަދަލުކުރާނެއެވެ. އަދި ކްރިޓިކަލް ހާލަތްތަކުގައި ފަރުވާ ދިނުމަށް ހާއްސަ ކުރެވޭ ތަނަކަށް ބަދަލުކުރާނެއެވެ.

މާލެ ގުރޫފް އޮފް ހޮސްޕިޓަލްސްގެ ސީއީއޯ ވިދާޅުވީ ހުޅުމާލެ ހޮސްޕިޓަލް ޓަރޝަރީ ހޮސްޕިޓަލެއްގެ ގޮތަށް ތަރައްގީކުރާއިރު އީއާރް ބޮޑުކުރުމަކީ ކޮންމެހެން ވެސް ކުރަންޖެހޭ ކަމެއް ކަމަށެވެ. އަދި އެ މަސައްކަތް ކުރިއަށްދާއިރު، އެތަނުގެ ހިދުމަތްތައް ދޭނީ ހޮސްޕިޓަލުގެ އެހެން ބައެއްގައި ކަމަށެވެ.

އާރްޑީސީގެ އެމްޑީ ވަނީ ކަނޑައެޅިފައިވާ މުއްދަތުގައި އެކުންފުނިން މަސައްކަތް ނިންމާނެކަމުގެ ޔަގީންކަން އެބައޮތް ކަމަށެވެ.