ރާއްޖެއަށް ކުރަމުންދާ ވިއްސާރާގައި ޅ. ކުރެންދޫގައި ފެންބޮޑުވުމުން އެރަށު ފެނަކަ ބްރާންޒުގެ މުވައްޒަފުންގެ އެހީތެރިކަން ފޯރުކޮށްދީފިއެވެ.

އެގޮތުން އެރަށުގެ ގެތަކުން ފެން ހިންދުމާއި މުދާތައް ރައްކާކުރުމުގައި އެ ކުންފުނީގެ މުވައްޒަފުން ވަނީ އަމަލީގޮތުން ބައިވެރިވެފައެވެ.

ރާއްޖެއަށް މިހާރު ކުރަމުންދާ ވިއްސާރައިގައި އެރަށަށް މެދުކެނޑުމެއްނެތި ގާތްގަޑަކަށް ދެގަޑިއިރު ބޯކޮށް ވާރޭ ވެހުމުގެ ސަބަބުން އެރަށުގެ 104 ގެއަކަށް ފެންވަދެ، ބޮޑެތި ގެއްލުންތަކެއްވެފައިވާކަމަށް ކައުންސިލުން ވަނީ ހާމަކުރައްވާފައެވެ. އަދި ރަށުގެ ތިންބައިކުޅަ ދެބައި ގެތަކަށް ފެންވަދެ، މީގެތެރެއިން 70 ވަރަކަށް ގެއަށް ވަރަށްބޮޑަށް ގެއްލުން ލިބިފައިވާ ކަމަށް ހާމަކުރެއްވިއެވެ.

މީގެއިތުރުން ބައެއް ގޭގައި ހިފާގެންގުޅޭ ސާމާނަށް ބޮޑެތި ގެއްލުންވެފައިވާއިރު، ބައެއް ފަރުނީޗަރުތައް ވެސް އަލުން ބޭނުން ނުކުރެވޭވަރަށް ހަލާކުވެފައިވާ ކަމަށް މައުލޫމާތު ދެއްވައެވެ. އަދި ވަގުތީ ބޯހިޔާވަހިކަން ބޭނުންވެއްޖެނަމަ، އެ އެހީތެރިކަން ދިނުމަށް ރަށުގެ ސްކޫލްގައި ވަގުތީ ހިޔާއެއް ހަދާފައިވާ ކަމަށާއި ކެއިންބުއިމުގެ ކަންކަން ހަމަޖެއްސުމަށް ވެސް ކައުންސިލުން އެހީތެރިކަން ފޯރުކޮށްދެމުން އަންނަކަމަށް ވިދާޅުވިއެވެ.