ސްޓެލްކޯގެ މުވައްޒަފުން އަބަދުވެސް ދައްކަވަނީ ކެތްތެރިކަމާއި، އޯގާތެރިކަމާއި، ޒިންމާދާރުކަމުގެ ވަރުގަދަ ނަމޫނާއެއް ކަމުގައި އެ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ރާއްޖެއަށް މިހާރުކުރަމުން މިދާ ވިއްސާރައިގާ އޮމަދޫގެ މަގުތަކުގައި ފެންބޮޑުވުމުން އެމަގުތަކުން ފެން ހިންދުމުގައި އެހީތެރިވެދީފައިވާތީއެވެ.

އެރަށު ކައުންސިލުން ވެސް ވަނީ އެކަން ފާހަގަކޮށް، އެކްސް ގައި ޕޯސްޓެއްކޮށްފައެވެ.

އެޕޯސްޓާއި ގުޅިގެން އެމްޑީ ފަހުމީ ކުރެއްވި ޕޯސްޓުގައި އެ މުވައްޒަފުންނަށް ޝުކުރު އަދާކުރައްވައި، ވިދާޅުވީ މި ގަައުމުގެ ރައްޔިތުންނަށް ހިދުމަތް ކުރުމުގައި ދައްކަވާ ވަރުގަދަ އަޒުމާއި ފޯރި، ކުރައްވާ ކޮންމެ މަސައްކަތަކުން ފެންނަމުންދާ ކަމަށެވެ.

"ފެންބޮޑުވުމާއި، ޤުދުރަތީ ކާރިސާތަކާއި، އަދި އަޅުގަނޑުމެންނަށް ކުރިމަތިވާ އެހެނިހެން ގޮންޖެހުންތަކަށް އިޖާބަދިނުމުގައި ތިޔަބޭފުޅުން ތިޔަދައްކަވަނީ ނަމޫނާ." އެމްޑީ ވިދާޅުވިއެވެ.

މީގެއިތުރުން ނާޒުކު ވަގުތުތަކުގައި ކުރިއަށް ނުކުމެ، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ދައްކަވާ ޖޯޝަކީ އިޚްލާޞްތެރިކަމާއި ޕްރޮފެޝަނަލްކަމުގެ ހެއްކެއްގެ ގޮތުގައި ވެސް ފާހަގަކުރެއްވިއެވެ.

އެމްޑީ ވިދާޅުވީ ސްޓެލްކޯގެ މަގްސަދަކީ ހަމައެކަނި ހަކަތަ ފޯރުކޮށްދިނުމެއް ނޫން ކަމަށެވެ. އަދި ސްޓެލްކޯގެ ޓީމުގެ ކޮންމެ މެންބަރަކަށްމެ، ބުރަ މަސައްކަތާއި އަމިއްލަ ނަފްސަށްވުރެ އިސްކަންދީގެން ކުރައްވާ ހިދުމަތް ފާހަގަކުރެވޭކަން އަންގައިދޭކަން ވެސް އެމްޑީ ފާހަގަކުރެއްވިއެވެ.