ފިލްމު އުފައްދާ ފަރާތްތަކުން ކޮންމެ ފިލްމެއް ވެސް އުފައްދާނީ ވަރަށްބޮޑު ޔަގީންކަމަކާއި އުއްމީދަކާއި އެކުގައެެވެ. ހާއްސަކޮށް ކާމިޔާބު ފިލްމެއް ނުވަތަ ފިލްމުތަކެއް އުފައްދާފައިވާ ޕްރޮޑަކްޝަނަކުން މިކަމަށް ވަރަށްބޮޑު ސަމާލުކަމެއް ދޭނެވެސް މެއެވެ.

އެހެނަސް ބެލުންތެރިންގެ ނަޒަރުގައި އެއީ ކަމުދާ ފިލްމެއްތޯ ނުވަތަ ނޫންތޯ ކަނޑައެޅުމުގެ އިހްތިޔާރެއް ފިލްމު އުފައްދާ ފަރާތަކަށް ވެސް އަދި އެކްޓަރުންނަކަށް ވެސް ނޯންނާނެއެވެ.

ކަންމިހެން އޮތްއިރު، ދިވެހި ފިލްމުތަކަށް ލޯބިކުރާ ގިނަ ބަޔަކު އިންތިޒާރުކުރަމުން އައި 'ދޭދަރު ރުއިން' މި ނޮވެމްބަރ މަހުގެ 20 ވަނަ ދުވަހުގެރޭ އޮލިމްޕަސް ސިނަމާގައި ވަނީ ޕްރިމިއަރކޮށްފައެވެ.

ކަޒްމިކް އިންޓަރނޭޝަނަލް އާއި އައިފިލްމްސް އިން އުފެއްފދި މި ފިލްމަކީ އިންސާނުން ޓްރެފިކް ކުރުމާއި ވިޔަފާރިކުރުމުގެ މައްސަލައަށް އަލިއަޅުވާލާ ފުރަތަމަ ދިވެހި ފިލްމެވެ.

އެކްޝަން، ކްރައިމް، ޑްރާމާ ހިމަނާފައިވާ މި ފިލްމުގައި ރޭވިގެން ކުރެވޭ ކުށްތަކާއި، ގެވެށި އަނިޔާއާއި، ކުޑަކުދިންނަށް ނުރައްކާވުން ދައްކުވައިދިނެވެ. އަދި ކުޑައިރު ލިބޭ ނަފްސާނީ ޓްރޯމާ އަށް ވެސް އަލިއަޅުވާލާފައިވާއިރު، ފިލްމުގައި ދައްކުވައިދޭ އެއް ދުވަސް ތެރޭގައި މި ހުރިހައި މައްސަލަތައް އެއްވެ، ގުޅި ދިޔައީ ލާމެހިގެންނެވެ.

ފާޑުކިޔުމަކީ ކުރިއަށްދާން ލިބޭ އިތުރުހިތްވަރެއް ކަމުގައިވާއިރު، ފާއިތުވި ދެރޭ މި ފިލްމު ބެލި ބައެއް ފަރާތްތަކުން ވަނީ ތަފާތުއެކި ފާޑުކިޔުން އަމާޒުކޮށްފައެވެ. ފިލްމު ފެށިގެން އައި ގޮތް ވަރަށް ކަމުދިޔައިރު، ޖިމީގެ ދަރިފުޅު ގެއަށް ވަންނަ ހިސާބުން ދެން ކަންކަން ވަމުންދިޔަގޮތް ކަމުނުދިޔަ މީހުން ވެސް ތިއްބެވެ.

އެކްޓަރުންގެ ހުނަރަށް ތައުރީފުކުރި މީހުން ވެސް ތިބިއިރު، ބައެއް އެކްޓަރުން މީގެކުރިން ދައްކާފައިވާ ހުނަރަށްވުރެ، މި ފިލްމުގައި ދައްކާފައިވާ ހުނަރު ކަމުނުދާ ވާހަކަ ވެސް ހާމަކުރި ބެލުންތެރިން ތިއްބެވެ.

ބެލުންތެރިންނަށް އެގޮތަށް ފާހަގަވި ކަމެއްގެގޮތުގައި އަޅުގަނޑަށް ބެލެވެނީ ކޮންމެ ފިލްމަކީ ވެސް ތަފާތު ވާހަކައަކަށް، ތަފާތު ޖޯންރާއަކަށް ހަދާ ފިލްމަކަށްވާއިރު، އެކްޓަރުންގެ ތައްޔާރުވުން ވެސް ތަފާތުވާނެތީއެވެ. އަދި ކަޒްމިކް އިންޓަރނޭޝަނަލް އާއި އައިފިލްމްސް އިން މީގެކުރިން ގެނެސްދީފައިވާ އުފެއްދުންތަކުގެ ސަބަބުން ބެލުންތެރިންގެ އެކްސްޕެކްޓޭޝަން މަތިވުމަކީ ވެސް މިފަދަ ވާހަކައަށް މަގުތަނަވަސްވާނެކަމެއް ކަމުގައި އަޅުގަނޑު ދެކެމެވެ.

ހަމަގައިމުވެސް މުޖުތަމައަށް ނުހަނު ބޭނުންތެރި މެސެޖެއް މި ފިލުމުގައި ދީފައިވާކަމަށް ގަބޫލުކުރެވެއެވެ. ތަފާތުގޮތަކަށެވެ. ވަށާޖެހޭ ގޮތަށެވެ.

އެކްޓަރުންގެ ތެރެއިން ޝަރަފުއްދީން ޢަބްދުﷲ (ޝަރަފް) އާއި ‏މައިހާ އާދަމް ޒާހިރު އަދި ނޭޕާލު ޝުޝްމާގެ ހުނަރު ވެސް ގޯހެކޭ ނުބުނެވޭނެއެވެ. އަދި ފައިރޫޒު ކެރެކްޓަރ ވަރަށް ފާހަގަކޮށްލެވޭއިރު، ހާޒިފް، މޫސާ ރަޝީދު އަދި އަލީފުގެ އެކްޓިންގ ވެސް ރަނގަޅެވެ.

އެހެނަސް ކޮންމެކަމެއްގައި ވެސް ރަނގަޅުކުރަންޖެހޭ ކަންކަން ހުންނާނެކަން ކަށަވަރެވެ. އެކަންކަން ޕޮޒިޓިވްކޮށް ނަގައި، ކުރިއަށް އޮތް ތަނުގައި އެކަންކަން ތަކުރާނުވާނޭގޮތަކަށް ކުރުމުން ހުންނާނީ ބަރާބަރަށެވެ.

ދޭދަރު ރުއިން ގެ ޑައިރެކްޝަން ހަދާފައިވަނީ މިދާއިރާ އަށް އަލަށް ތައާރަފްވާ އައްޒާމުއެވެ. ސިނަމަޓޮގްރަފީ އިސްމާޢީލް ޔާނިމް (އޮކްނޯ) ހަދާދީފައިވާއިރު، އެޑިޓަރަކީ އާދަމް ޝިނާދު (އޮކްނޯ) އެވެ. އަދި ސައުންޑް އަދި ކްރޫ އޮކްނޯ ހަދާފައިވާއިރު، މިއުޒިކް/ބެކްގްރައުންޑް ހަދާފައިވަނީ ފައްޗުއެވެ.

މޭކަޕް އާޓިސްޓުންގެ ގޮތުގައި ހަރަކާތްތެރިވެފައިވަނީ ރާއްޖޭގައި މިދާއިރާއިން އެންމެކުރިއަރާފައިވާ ދެފަރާތްކަމަށްވާ ރުތުބާ އަޙްމަދުއާއި ސޭންޑީއެވެ.

ދޭދަރު ރުއިން ފިލްމުގެ ޓިކެޓް، 7242555 ނަންބަރަށް ވައިބަރ ކުރުމުން ގަނެވޭނެ އިންތިޒާމު ވަނީ ހަމަޖައްސާފައެވެ.