ގިޔާމަތް ދުވަހުން އެއްވެސް މީހަކަށް ނުފިލޭނެކަމަށާއި އެ ދުވަހުން ހެޔޮ ޢަމަލުކޮށް އުޅުނު މީހާ އުފާ ކުރާނެކަމުގައި ހުކުރު ހުތުބާގައި ހަނދާންކޮށްދީފިއެވެ.

ހުކުރު ހުތުބާގައި ބުނީ އެދުވަހުން (ގިޔާމަތް ދުވަހުން) ކޮންމެ ތަނެއްގައި ކޮންމެ ގޮތަކަށް މީހަކު ދުނިޔެ ދޫކޮށްފައި ވިޔަސް އެކަލާނގެ އެމީހަކު މަހްޝަރުކުރައްވާނެކަން ވަނީ ހަނދުމަކޮށްދީފައެވެ.

"ޖައްވުގައި ވިޔަސް، ފުން ބިންގަރާހެއްގެ އެންމެ އަޑީގައި ވިޔަސް، ވަލުޖަނަވާރެއްގެ ބަނޑުގައި ވިޔަސް، އަދި މި ނޫން ގޮތަކަށް ވިޔަސް، ގިޔާމަތްދުވަހު އެންމެން އެއްތަންކުރެއްވުމަކީ އެކަލާނގެއަށް ދާދި ފަސޭހަކަމެކެވެ." ހުތުބާގައި ބުނެފައި ވެއެވެ.

ހުތުބާގައި އިތުރަށް ބުނީ އެ ދުވަހުން ހެޔޮ ޢަމަލުކޮށް އުޅުނު މީހާ އުފާ ކުރާނެ ކަމަށާއި މާތް ﷲގެ މަގުން މޫނު އެނބުރި މީހާ ހިތާމަ ކުރާނެކަމަށެވެ.

މީގެއިތުރުން ރަހިމުގެ ގުޅުމަކުން ނުވަތަ ބައިބޮޑުކަމަކުން މަންފާއެއް ކުރާ ވަރަށްވުރެ ގިޔާމަތް ދުވަހުގެ ބިރުވެރިކަން މާ ބޮޑުކަން ފާހަގަކޮށް، އެ މީހެއްގެ އެންމެ ލޯބިވާ މައިންބަފައިންނާއި، އަނބިދަރީންނާއި، އެއްބަނޑު އެއްބަފާ މީހުން، ގޮތް ހުސްވެފައިވާ ހާލުގައި ފެނުނަސް އެއްވެސް ފަރުވާލެއް ނުބަހައްޓާނެ ކަމަށް ބުނެފައި ވެއެވެ.

އެދުވަހުގެ ބިރުވެރި ކަމާއި ނާމާންކަން ބަޔާންކޮށް ހުތުބާގައި ބުނެފައިވަނީ ގިޔާމަތް ދުވަސް ދިގުލައިގެން ދިޔުމުގެ ސަބަބުން މީސްތަކުންގެ ހާލު ބޮޑުވެ، ކަރުހިއްކުން އިންތިހާއަށް އިތުރުވެފައި ވަނިކޮށް މާތްﷲ ގެ ރަހުމަތުން އެކަލާނގެ ނަބިއްޔާ އަށް ހައުޟުކޮޅު ދެއްވާނެ ކަމަށެވެ. އަދި އޭގެ ފެން، ކިރަށް ވުރެ ހުދުވާނެ ކަމަށާއި މާމުޔަށް ވުރެ ފޮނިވާނެކަމަށް ވެސް ބުނެފައި ވެއެވެ.

އެއިން ފެންބުއިމުގެ ނަސީބު ލިބިގެންދާނީ މާތްﷲ އަށް ފުރިހަމަ ގޮތުގައި އީމާންވެ، އެކަލާނގެއަށް އިހްލާސްތެރިކަމާ އެކު އަޅުކަންކޮށް، ނަބިއްޔާ އަށް ތަބާވާ މީހުންނަށް އެކަނިކަން ހުތުބާގައި ފާހަގަކުރިއެވެ.