ވ. އަތޮޅުގައި ނާޒުކު ހާލަތްތަކުގައާއި ދަތި ހާލަތްތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދޭން ފަށައިފިއެވެ.

މިއީ އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއާއި އެހީ ޖަމުއިއްޔާ އާއި ވ. އަތޮޅު ކައުންސިލާއި ގުޅިގެން ފެށި މަސައްކަތެކެވެ.

އެހީ ޖަމުއިއްޔާއާއި އެ މިނިސްޓްރީއާއި އެކު ހަދާފައިވާ ފަހުމުނާމާގެ ދަށުން، އެ އަތޮޅު ކައުންސިލުގެ އެހީތެރިކަމާއެކު ދަތިހާލުގައި އުޅޭކަމަށް އެ ކައުންސިލުން ދެނެގަނެފައިވާ އާއިލާތަކަށް ދާއިމީ ބޯހިޔާވަހިކަން ހޯދައިދިނުމަށް ވަނީ ނިންމާފައެވެ.

މި ޕްރޮގްރާމުގެ ދަށުން މި އާއިލާތަކާއި އެ އަތޮޅުގައި ދަތިހާލުގައި ދިރިއުޅޭ އިތުރު އާއިލާތަކުގެ ދިރިއުޅުމުގެ ހާލަތު ދެނެގަނެ، ދެވެންހުރި އެހީތެރިކަން ދިނުމުގެ މަސައްކަތް ކުރުމަށް މަޝްވަރާތައް ވެސް މިހާރުވަނީ ކޮށްފައެވެ.

ދަތި ހާލުގައި އުޅޭ ފަރާތްތަކަށް އެހީތެރިކަން ފޯރުކޮށްދިނުމާއި، އެމީހުންގެ ހާލަތު ރަނގަޅުކުރުމަށް ކުރެވޭ ކޮންމެ މަސައްކަތަކީ ސަރުކާރުގެ ކަމާ ބެހޭ މުއައްސަސާތަކާއި، އިޖްތިމާއީ ޚިދުމަތްތެރިންނާއި، ދަރުމަވެރިންގެ އެހީތެރިކަމާއެކު ކުރިއަށްގެންދާ ޕްރޮގްރާމުތަކެކެވެ.

މީގެއިތުރުން މި ޕްރޮގްރާމު ކުރިއަށް ގެންދަނީ އާންމު ފަރުދުންގެ އެހީތެރިކަމާވެސް އެކުގައެވެ.