މާލެއަތޮޅު ގުޅިން ފާނަބަސަންދުގެ ކޭސްތަކެއް ފެނިއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިކަން މީޑިއާ އަށް ހާމަކޮށްފައި މިވަނީ އެރަށުން ވަރިސެއްލާ ނިއުމޯނިއާ ކޭސްތަކެއް ފެނުުނުކަމުގެ އަޑުތައް ފެތުރެމުން ދަނިކޮށްނެވެ.

އެޗްޕީއޭ އިން ވިދާޅުވީ މި އަހަރުގެ ނޮވެމްބަރު މަހު އެރަށުން ފާނަބަސަންދުގެ 11 ކޭސް ރިޕޯޓް ކޮށްފައިވާ ކަމަށެވެ. އަދި މީގެ ތެރެއިން ދެ މީހަކު އައިޖީއެމްއެޗުގައި އެނދުމަތިކޮށްގެން އިތުރު ފަރުވާދެމުން ދާ ކަމަށެވެ.

މީގެއިތުރުން ރާއްޖޭގެ އެކި ހިސާބުތަކުން ކޮންމެ އަހަރަކު ވެސް ފާނަބަސަންދުގެ ކޭސްތައް ފެނިގެން ރިޕޯޓް ކުރާ ކަމަށް އެ އިދާރާ އިން ފާހަގަކުރައްވައެވެ.

ފާނަބަސަންދު ޖެހުމުން ވަރަށް ގަދައަށް ހިރުވާ ބިހިތަކެއް ގައިގައި ނަގާއިރު، މި ބިހިތައް ނެގުމަށްފަހު ދެތިން ދުވަސްތެރޭގައި ގައިގެ އެކި ތަންތަނަށް ފެތުރެއެވެ. އަދި މި ބިހިތައް ވަރަށް އަވަހަަށް ފަޅައިގެން ދެއެވެ.

މިއީ ނޭވާލާ ނިޒާމުގެ ޒަރިއްޔާއިން ވެސް ޖެހޭ ބައްޔަކަށް ވާއިރު، ފާނަ ބަސަންދު ޖެހިގެން ފުރަތަމަ ދެދުވަހު ނޭފަތުން ފެންއައިސް ހުން އަންނަން ފަށައެވެ. ނަމަވެސް އެދުވަސްވަރު ހަށިގަނޑުން ބިހިނަގާކަށް ނުފަށާނެއެވެ. ބަލިމީހާ ކެއްސާ، ކިނބިހި އަޅާ ހަދާއިރު ކައިރީގައި ތިބޭ މީހުންނަށް އެބަލި ޖެހެއެވެ.

މިބަލިން ރައްކާތެރިވުމަށް ބަލި ޖެހިފައިވާ މީހުންގެ ގެއަށް ޒިޔާރަތް ކުރުން ވަގުތީގޮތުން ހުއްޓާލަން ޖެހެއެވެ. އަދި ބަލިމީހާގެ ގައިގައި ނަގާފައިވާ ބިހިތަކުގައި ކުރަމަގާލި ލައި، ރަނގަޅު ނުވަނީސް އޭނާވެސް ބޭރަށް ނުކުމެގެން ނުވާނެއެވެ.