ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދާއިރާތަކުގެ އިންތިހާބު މާދަމާ (ނޮވެމްބަރ 23) ގައި އޮންނާނެއެވެ.

މި އިންތިހާބު ބޭއްވުމަށް މީގެކުރީން ދެ ތާރީހެއް ކަނޑައެޅިއެވެ. އެއީ އޮކްޓޯބަރ 19 ވަނަ ދުވަހާއި މި ހިނގާ ނޮވެމްބަރ މަހުގެ 9 ވަނަ ދުވަހެވެ.

އެހެންނަމަވެސް މީގެތެރެއިން ފުރަތަމަ ތާރީހު ބަދަލުކުރީ ޝައުގުވެރިވާ ގިނަ ފަރާތްތަކަކުން އިންތިހާބު ބާއްވާ ތާރީހާއި ކުރިމަތިލުމަށް ދެވުނު މުއްދަތު އިތުރުކޮށްދިނުމަށް އެދެމުން ގެންދާތީއެވެ. އަދި ދެވަނަ ތާރީހަށް ބަދަލު ގެނައީ ރާއްޖޭގެ ޖުމްހޫރީ ދުވަހާއި ގުޅިގެން މި މަހުގެ 10 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑައެޅުއްވުމުންނެވެ.

މި އިންތިހާބުގެ ވޯޓުލުން ކުރިއަށް ގެންދިއުމަށް ނިންމާފައިވަނީ ހެނދުނު 10 ން މެންދުރުފަހު 2 ޖެހުމާއި ހަމައަށެވެ.

ދަރުބާރުގޭގައި ބަހައްޓާނީ މާލޭގެ ދާއިރާތަކުގެ ފޮށިތަކާއި އަތޮޅުތަކުގެ ފޮށިތަކެވެ. ހުޅުމާލޭގެ ދާއިރާތަކުގެ ފޮށިތައް ބެހެއްޓުމަށް ހަމަޖައްސާފައިވަނީ ރެހެންދި ސްކޫލުގައެވެ. އަދި ވިލިމާލެ ދާއިރާގެ ފޮށި މުހިއްޔުއްދީން ސްކޫލުގައި ބަހައްޓާއިރު، ރަށްރަށުގައި ފޮށިތައް ބަހައްޓާނީ ސްކޫލު އިމާރާތްތަކުގައެވެ.

ޕީއެންސީގެ މި އިންތިހާބުގައި ދާއިރާގެ ރައީސް އަދި ނައިބު ރައީސް، ޒުވާނުންގެ ހަރަކާތުގެ ރަށުގެ ރައީސް އަދި އަންހެނުންގެ ހަރަކާތުގެ ރަށުގެ ރައީސް އަދި ސްޓިއަރިންގ ކޮމިޓީގެ މެމްބަރުން އިންތިހާބުކުރާނެއެވެ.

ރައްޔިތުންގެ މަޖިލިހުގެ މެމްބަރުންގެ ގޮތުގައި އެ ޕާޓީ ތަމްސީލުކުރައްވާ މެމްބަރުން ތިއްބެވި ދާއިރާތަކުގެ ރައީސުންނަށް ވާނީ މަޖިލިސް މެމްބަރުންނެވެ. އެހެންވެ، އެ ދާއިރާތަކަށް ހޮވާނީ ނައިބު ރައީސުންނެވެ. އަދި އެ ނޫން ދާއިރާތަކަށް ރައީސުންނާއި ނައިބު ރައީސުން ހޮވާނެއެވެ.

މި އިންތިހާބުގައި މި މަގާމުތަކަށް 2،095 މެމްބަރުން އިންތިހާބު ކުރާނެކަމަށް އެ ކޮންގްރެސް އިން ވަނީ މައުލޫމާތު ދެއްވާފައެވެ.

އެގޮތުން ކޮންމެ ރަށަކާއި ސިޓީއަކުން ސްޓިއަރިންގ ކޮމިޓީއެއް ހޮވާއިރު، އާބާދީގައި 3،000 މީހުންނަށް ވުރެ މަދުން މީހުން ދިރިއުޅޭ ރަށްރަށުގައި ހޮވާނީ 7 މެމްބަރުންގެ ކޮމިޓީއެކެވެ. އަދި 3،000 އަށް ވުރެ ގިނަ މީހުން ދިރިއުޅޭ ރަށްރަށުންނާއި ސިޓީތަކުގެ ދާއިރާތަކުން ކޮންމެ ދާއިރާއަކަށް 9 މެމްބަރުންނެވެ.