ވައުދަށް ހުރުމަތްތެރިކޮށް ހިތުމާއި ކެތްތެރިވުމާއި މި ސިފަތަކަކީ މިފަދަ ޒަމާނެއްގައި ކޮންމެހެން ތަބާވުން މުހިންމު ސިފަތަކެއްކަމުގައި އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމަނިކުފާނު މިފަދައިން ފުވައްމުލައް ސިޓީގައި ބޭއްވި ޒިކުރާ އިންޓަރނޭޝަނަލް ކޮލެޖްގެ ދަސްވެނިވުމުގެ ހަފުލާގައި ވާހަކަ ދައްކަވަމުންނެވެ.

ނޮވެމްބަރ 22 ވީ ހުކުރު ދުވަހުގެ ރޭ ބޭއްވި މި ހަފުލާ ޝަރަފްވެރިކޮށްދެއްވައި، ވާހަކަ ދައްކަވަމުން މިނިސްޓަރު ވިދާޅުވީ އިސްލާމްދީނަކީ ހަމައެކަނި ފިޤުހީ މައްސަލަތަކެއް ނޫންކަމަށެވެ. އަދި އިސްލާމްދީނަކީ އިލްމާއި ކުރިއެރުންތަކުގެ ދީން ކަމަށެވެ.

"އިސްލާމީ ހަޟާރަތަކީ އިލްމު އުނގެނުމަށް ގޮވައިލާފައިވާ ހަޟާރަތެއް. މުސްލިމުންގެ ހަޔާތުގައި ހޯދާ ކުރިއެރުންތަކުގައި ވަހީގެ އަސަރު ހުންނަންޖެހޭނެ." މިނިސްޓަރު ވިދާޅުވިއެވެ.

މީގެއިތުރުން ކޮންމެ ދަރިވަރަކު ވެސް ދަސްވެނިވުމަށް ފަހު މުޖްތަމައަށް ހިދުމަތްކުރަން ނިކުންނަންވާނީ ﷲ ގެ ވަޖުހުފުޅު އެދިގެންކަމަށާއި މީސްތަކުންނަށް އިހުސާންތެރިވުމާއި ހިދުމަތް ދިނުމުގައި މާއްދީ ފައިދާއެއް ހޯދުމުގެ މައްޗަށް ސަވާބާއި ދަރުމަ ހޯދުން އިސްކުރުމަށް ކަމުގައި ވެސް ވިދާޅުވިއެވެ.

ހަމަމިއާއެކު ޑރ. ޝަހީމް ވަނީ އިސްލާމްދީނުގައި އިލްމާއި ތަރުބިޔަތަކީ ގުޅި ލާމެހިފައިވާ ދެ އަސާސްކަމުން ދަސްވެނިވެގެން ނިކުންނައިރު، އިސްލާމީ އަޚުލާގުން، އަޚުލާގު ލިބިގަނެ ނަމޫނާ ބަޔަކަށް ވުމަށް އިލްތިމާސްކުރައްވާފައެވެ. އަދި މައިންބަފައިންނަށް އިހްސާންތެރިވުމާއި އަވައްޓެރިންނާއި މެހުމާނުންނަށް ހެޔޮކޮށް ހިތުމާއި ހެޔޮ ބަސްބުނުމަކީ ﷲ އަށްޓަކައި ދިރިއުޅޭ މީހުންގެ އަޚުލާގުކަމުގައި ވެސް ވިދާޅުވިއެވެ.

ވަހީގެ މައްޗަށް ބިނާ ނުވާ ކޮންމެ ފިކުރަކާއި ތަރައްގީއަކާކުރިއެރުމެއް އިންދިރާސްވެދާނެކަމަށާއި ދެމިގެންދާނެ ހަޟާރަތަކީ ވަހީގެ މައްޗަށް ބިނާވާ ހަޟާރަތްކަމަށް ވެސް ވަނީ ފާހަގަކުރައްވާފައެވެ. އަދި އެއީ އިސްލާމީ ހަޟާރަތުކަމުގައި ވެސް ވިދާޅުވިއެވެ.

ޒިކުރާ އިންޓަރނޭޝަނަލް ކޮލެޖުން އިލްމު ފަތުރައި، އިންސާނިއްޔަތަށް ހިދުމަތްކުރުމުގައި ދައްކަމުންދާ ނަމޫނާއަށް މިނިސްޓަރު ވަނީ ޝުކުރު އަދާކުރައްވާފައެވެ.