ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދާއިރާތަކުގެ އިންތިހާބުގެ ވޯޓުލުން ފަށައިފިއެވެ.

މިއަދު ހެނދުނު 10 ޖެހިއިރު، ފެށި މި އިންތިހާބު މެންދުރު 2 ޖެހުމާއި ހަމައަށް ކުރިއަށްދާނެއެވެ.

ދަރުބާރުގޭގައި ބަހައްޓާފައިވަނީ މާލޭގެ ދާއިރާތަކުގެ ފޮށިތަކާއި އަތޮޅުތަކުގެ ފޮށިތަކެވެ. ހުޅުމާލޭގެ ދާއިރާތަކުގެ ފޮށިތައް ރެހެންދި ސްކޫލުގައި ބަހައްޓާފައި ހުރިއިރު، ވިލިމާލެ ދާއިރާގެ ފޮށި ހުރީ މުހިއްޔުއްދީން ސްކޫލުގައެވެ. އަދި ރަށްރަށުގައި ފޮށިތައް ބަހައްޓާފައިވަނީ ސްކޫލު އިމާރާތްތަކުގައެވެ.

ޕީއެންސީގެ މި އިންތިހާބުގައި ދާއިރާގެ ރައީސް އަދި ނައިބު ރައީސްއާއި ޒުވާނުންގެ ހަރަކާތުގެ ރަށުގެ ރައީސްއާއި އަންހެނުންގެ ހަރަކާތުގެ ރަށުގެ ރައީސް އަދި ސްޓިއަރިންގ ކޮމިޓީގެ މެމްބަރުން އިންތިހާބުކުރާނެއެވެ.

ރައްޔިތުންގެ މަޖިލިހުގެ މެމްބަރުންގެ ގޮތުގައި އެ ޕާޓީ ތަމްސީލުކުރައްވާ މެމްބަރުން ތިއްބެވި ދާއިރާތަކުގެ ރައީސުންނަށް ވާނީ މަޖިލިސް މެމްބަރުންނެވެ. އެހެންވެ، އެ ދާއިރާތަކަށް ހޮވާނީ ނައިބު ރައީސުންނެވެ. އަދި އެ ނޫން ދާއިރާތަކަށް ރައީސުންނާއި ނައިބު ރައީސުން ހޮވާނެއެވެ.

މި އިންތިހާބުގައި މި މަގާމުތަކަށް 2،095 މެމްބަރުން އިންތިހާބު ކުރާނެކަމަށް އެ ކޮންގްރެސް އިން ވަނީ މައުލޫމާތު ދެއްވާފައެވެ.

އެގޮތުން ކޮންމެ ރަށަކާއި ސިޓީއަކުން ސްޓިއަރިންގ ކޮމިޓީއެއް ހޮވާއިރު، އާބާދީގައި 3،000 މީހުންނަށް ވުރެ މަދުން މީހުން ދިރިއުޅޭ ރަށްރަށުގައި ހޮވާނީ 7 މެމްބަރުންގެ ކޮމިޓީއެކެވެ. އަދި އެ އަދަދަށް ވުރެ ގިނަ މީހުން ދިރިއުޅޭ ރަށްރަށުންނާއި ސިޓީތަކުގެ ދާއިރާތަކުން ކޮންމެ ދާއިރާއަކަށް 9 މެމްބަރުންނެވެ.