ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް، މިހާރުގެ ރައީސް ޑރ. މުޙައްމަދު މުޢިއްޒުވާނެކަމަށް ހިސާބުތަކުން ދައްކާކަމުގައި ރައްޔިތުންގެ މަޖިލީހުގެ ރައީސް އަބްދުއްރަހީމް ޢަބްދުﷲ ވިދާޅުވެއްޖެއެވެ.

ޕީއެސްއެމް ނިއުސް އިން ގެނެސްދޭ ހަފްތާ 52 ޕްރޮގްރާމުގައި ވާހަކަ ދައްކަވަމުން އަބްދުއްރަހީމް ވިދާޅުވީ ރައީސް ޑރ. މުޢިއްޒުގެ ސަރުކާރު، ފެނިވަޑައިގަންނަވަނީ ވަރަށް ކާމިޔާބުކޮށް ކަމަށެވެ.

އެހެންނަމަވެސް ގޮންޖެހުންތަކާއި ފާޑުކިޔުން ހުންނާނެކަމަށާއި އެ ކަންކަމަށް ކުރިމަތިލައިގެން ކާމިޔާބު ހޯދަން ފަސޭހަވާނެކަމަށް އަބްދުއްރަހީމް ވިދާޅުވިއެވެ. އަދި ބައެއް ސިޔާސީ ލީޑަރުން ވަކިހިސާބަކުން ގެއްލުގެންދާތަން ފެނުނުނަމަވެސް ރައީސްގެ ތާއީދު ދަނީ އިތުރުވަމުންކަން ފާހަގަކޮށް އަދުރޭ ވިދާޅުވީ ރައީސް ޑރ. މުއިއްޒުގެ ސިޔާސީ ތަރި، ދުވަހެއް ދުވަހަަކަށް އަރަމުން އަންނަކަމަށެވެ.

"އަޅުގަނޑުގެ ސިޔާސީ ހިސާބުން، ރާއްޖޭގައި ޢަމަލުކުރަމުން އަންނަ ފެހި ގާނޫނު އަސާސީގެ ދަށުން ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާނެ." އަދުރޭ ވިދާޅުވިއެވެ.

މީގެއިތުރުން އެމަނިކުފާނު ސިޔާސީ ހިސާބު ޖައްސަވަނީ ރާއްޖޭގެ ސިޔާސީ މަސްރަހު ވަރަށް ބޮޑަށް އެނގިވަޑައިގެންކަމަށާއި އެގޮތުން ރާއްޖޭގެ އެންމެ އުތުރުން އެންމެ ދެކުނަށް، ކޮންމެ ރަށެއްގެ ސިޔާސީ ފިކުރާއި، ޢާންމު ރައްޔިތުންގެ ވިސްނުންތައް އެނގިވަޑައިގަންނަވާކަމަށް ވެސް ވިދާޅުވިއެވެ.

މަޖިލީހުގެ ރައީސް ވިދާޅުވީ އަމާޒަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމަށްފަހު، ރިޔާސީ ދެވަނަ ދައުރެއް ކާމިޔާބުކުރުންކަމަށެވެ.