ހިޔަނިފުޅު ޕްރޮޑަކްޝަނުން ކުރިޔަށް ގެންދިޔަ "ޓިކްޓޮކް ރީިތި އަޑު" ގެ ފުރަތަމަ ސީޒަން ޔޫސުފް ޝާފިީ ސައީިދު ކާމިޔާބު ކޮށްފިއެވެ.

ގާތްގަޑަކަށް 400 މީހުން ބަލަމުން ދިޔަ މިލައިވް ގައި ޝާފީ (ޓިކްޓޮކް ގައި މަޝްހޫރު ނަމުންނަމަ، ކޮންމެވެސް މީހެއް) އާއި ދެވަނަ އަށް ދިޔަ ޝިޒާން އަށް ޖަޖުންގެ ފުލްމާކްސް ލިބި އެއްވަރުވެފައިވާއިރު، މިއީ ޖަޖުންގެ 70 އިންސައްތަ އާއި ބެލުންތެރިންގެ 30 އިންސައްތަ ވޯޓުން ނަތީޖާ ނެރޭ މުބާރާތެކެވެ.

އެހެންކަމުން މިމުބާރާތުގެ އެއްވަނަ ޝާފީ ގެންދިޔައީ ބެލުންތެރިންގެ އެންމެގިނަ ވޯޓު ލިބިގެންނެވެ. އެއީ 117 ވޯޓެވެ.

ވަރަށް ވާދަވެރިކޮށް ކުރިޔަށް ދިޔަ މި މުބާރާތުގައި ގާތްގަނޑަކަށް 40،000 ރުފިޔާގެ އަގުހުރި އިނާމުތައް ހުށަހަޅާފައިވާއިރު، އޭގެތެރޭގައި އެއްވަނަ އަށްދިޔަ ފަރާތަށް ސެމީ އެކޯސްޓިކް ގިޓައަކާއި އޯޑިއޯ، އަދި ވީޑިއޯ ލަވަ އެއް ކޮމްޕޯސްކުރުމުގެ ފުރުސަތު އެސްޓިއަން ރިކޯޑްސްގެ ފަރާތުން ވަނީ ހުށަހަޅާފައެވެ.

މީގެއިތުރުން ޑި-ޓިއުންސް ބޭންޑްގެ ފަރާތުން ރޯދަ މަހު ޓީވީ ޗެނެލެއްގައި އެ ބޭންޑުގެ ފުރުގާން (ފިޖީއާ) އެކު ޕަރފޯމް ކުރުމުގެ ފުރުސަތު ވެސް ދިނުމަށް ވަނީ ނިންމާފައެވެ. އަދި އެ ބޭންޑުގެ އާޓިސްޓުން ސޮއިކޮށްފައިވާ އަލްބަމް އެއްވަނީ ދީފައެވެ.

ދެވަނަ އަށް ދިޔަ ޝިޒާން އަށް ފުލްއެކޯސްޓިކް ގިޓައަކާ އެކު އޯޑިއޯ ލަވައެއް ކޮމްޕޯސް ކުރުމުގެ ފުރުސަތު، ސިލްވަ ޓޯންސް ބޭންޑާ އެކު ރިސޯޓެއްގައި ގިގެއް ކުޅުމުގެ ފުރުސަތު ލިބޭނެއެވެ. އަދި ޑި-ޓިއުންސް ބޭންޑުގެ އާޓިސްޓުން ސޮއިކޮށްފައިވާ އަލްބަމް އެއް ދީފައެވެ.

ތިންވަނަ އަށް ދިިޔަ އަހޫ ވަނީ ވީ8 ސައުންޑްކާޑަކާ، ޑި-ޓިއުންސް ބޭންޑްގެ އާޓިސްޓުން ސޮއިކޮށްފައިވާ އަލްބަމްއެއް އަދި ވޮއިސް ޓްރޭނިންގ އަދި އެސްޓިއަން ރިކޯޑްސްގެ ލަވައެއްގައި ފީޗަރ ކުރުމުގެ ފުރުސަތު ދީފައެވެ. އަދި ހަތަރު ވަނަ އަށް ދިޔަ ޒެޕޯ އަދި ފަސްވަނަ އަށް ދިޔަ ނައުޓެ އަށް ލިބިފައި ވަނީ ޓިކްޓޮކް ސްޓޭންޑަކާއި 500 ރުފިޔާގެ ކޭޝް ޕްރައިޒެކެވެ.

ދެ މަސް ދުވަހަށް ކުރިޔަށް ގެންދިޔަ މި މުބާރާތުގައި 30 އަށް ވުރެ ގިނަ ފަރާތުން ބައިވެރިވެފައިވެއެވެ. ކޮންމެ ހަފުތާއަކު އެއްރޭ ކުރިޔަށް ގެންދިޔަ މި މުބާރާތުގެ ގްރޭންޑް ފިނާލޭ ނައިޓްގައި ޑި-ޓިއުންސް ބޭންޑް، އާޓިސްޓް އިސްމާއިލް ނަވާޒް ސައީދު، ލަވަކިޔުންތެރިޔާ ސާދިންގެ ރީތި ހުށަހެޅުންތައް ގެސްޓުންގެ ޕަފޯމަންސްގެ ގޮތުގައި ފެނިގެން ގޮސްފައިވެއެވެ.

މިމުބާރާތުގައި ޖަޖު ޕެނަލްގައި 6 ޖަޖުން ތިބިއިރު، ހެޑް ޖަޖަކީ މަޝްހޫރު ލަވަކިޔުންތެރިޔާ މުޙައްމަދު މައިސަން (ބޮކިޓޯސް) އެވެ. ދެން ތިބީ ސިރާ ދި ފްލޭމްސް، އެސްޓިއަން ރެކޯޑްގެ ފަރާތުން މިއްޓު، ޝަރޭ، އާއި ލަކީ އަދި ވެންޓަސް އެވެ.

ބޮކިޓޯސް ބުނީ މިއީ އާޓީސްޓުންނަށް ކުރިޔަށް ދިއުމަށް އަލަށް ހުޅުވުގެން ދިޔަ ފުރިހަމަ ޕްލެޓްފޯމެއް ކަމަށެވެ. އަދި ސީޒަން ދޭކަށް އިންތިޒާރު ކުރާ ކަމަށެވެ.

ހިޔަނިފުޅު ޕްރޮޑަކްޝަނުން ވަނީ ޓިކްޓޮކްގައި އަގުހުރި އިނާމުތަކާ އެކު މަދަހަ ދެމުބާރާތާއި ތަފާތު އެކި މުނިފޫހިފިލުވުމުގެ ޕްރޮގްރާމްތައް ވެއަތުވި ދެ އަހަރު ދުވަހުގެ ތެރޭގައި ގެންގޮސްފައެވެ.

މި ލައިވްގެ ހޮސްޓް ހިޔަނިފުޅު ޔޮންކޮ ވަނީ މަދަހަ މުބާރާތުގެ ތިންވަނަ ސީޒަން އަންނަ ރޯދަމަހު ކުރިޔަށް ގެންދާނެކަން އިއުލާންކޮށްފައެވެ.