ޕީޕަލްސް ނޭޝަނަލް ކޮންގްރެސް (ޕީއެންސީ)ގެ އެތެރޭގެ އިންތިހާބު ކާމިޔާބުކުރެއްވި ފަރާތްތަކަށް ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުހައްމަދު މުޢިއްޒު އާއި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް މަރުހަބާ ދަންނަވައިފިއެވެ.

ރައީސް، މީސް މީޑިއާގައި ހިއްސާ ކުރެއްވި ޕޯސްޓުގައިވަނީ މި އިންތިހާބުގައި އެކި މަގާމުތަކަށް ވާދަކުރެއްވި ކެންޑިޑޭޓުންނާއި، އިންތިހާބުގެ އިންތިޒާމްތަކުގައި އުޅުއްވި ހުރިހާ ބޭފުޅުންނަށް ވެސް އެމަނިކުފާނު ޝުކުރުއަދާކުރައްވާފައެވެ. އަދި އިންތިހާބުގައި ވޯޓުލީ ހުރިހާ މެމްބަރުންނަށް ވެސް ޝުކުރުއަދާކުރައްވާފައި ވެއެވެ.

މީގެއިތުރުން ނައިބު ރައީސް ވެސް ވަނީ މިފަދައިން ހުރިހައި ފަރާތްތަކަށް މަރުހަބާ އާއި ތަހުނިޔާ ދަންނަވާފައެވެ.

އެޕާޓީގެ އެތެރޭގެ އިންތިހާބުގެ ވޯޓުލުން 4 ގަޑިއިރަށް ކުރިއަށް ދިޔައިރު، ވޯޓުލުމަށް ޖުމްލަ 143 ފޮށި ވަނީ ބަހައްޓާފައެވެ. މީގެތެރެއިން 53 ފޮށި ބަހައްޓާފައިވަނީ މާލޭގައެވެ. 667 ކެންޑިޑޭޓުން ވާދަކުރެއްވި މި އިންތިހާބުގައި މާލެ ހިމެނޭހެން 90 ރަށެއްގައި ވޯޓުލުމުގެ ކަންކަން ވަނީ ކުރިއަށް ގެންގޮސްފައެވެ.

މި އިންތިހާބުގައި ވޯޓުލުމުގެ ހައްޤު 34904 ލިބިފައިވާ ކަމަށް ޕީއެންސީން ވަނީ ހާމަކޮށްފައެވެ. މިއާއެކު މި އިންތިހާބު ވެގެންގޮސްފައިވަނީ ރާއްޖޭގެ ސިޔާސީ ޕާޓީއަކުން ބޭއްވި އެންމެ ބޮޑު އެއް އިންތިހާބަށެވެ.