ރިޔާސީ ދައުރު ބަދަލުވާ ތާރީހަކީ ނޮވެމްބަރ 11 ވަނަ ދުވަސްކަމުގައި ހެދުމަށް ރައްޔިތުންގެ ވޯޓަކަށް ދިޔުމަށް ނިންމައިފިއެވެ.

މިކަން ހާމަކުރެއްވީ ސަރުކާރަށް އެއް އަހަރުގެ ފުރުމުގެ މުނާސަބަތުގައި ޕީއެސްއެމް ނިއުސް އަށް ދެއްވި ހާއްސަ ބަސްދީގަތުމެއްގައި އެޓަރނީ ޖެނެރަލް އަލްއުސްތާޛު އަޙްމަދު އުޝާމްއެވެ.

އެމަނިކުފާނު ވަނީ ރައީސް ޑރ. މުޙައްމަދު މުޢިއްޒު ބޭނުންފުޅުވާ ގޮތަކީ ޒަމާނުންސުރެ ރާއްޖޭގައި ކަންހިންގަމުން އައިގޮތަށް، ރިޔާސީ ދައުރު ބަދަލުވާ ތާރީހަށް އެކަން ބަދަލުކުރެއްވުން ކަމަށާއި އެގޮތުން އެއީ ނޮވެމްބަރު މަހުގެ 11 ވަނަ ދުވަހުގެ ގޮތުގައި ހަމަޖެއްސެވުން ކަމަށް ވިދާޅުވިއެވެ.

ގާނޫނުއަސާސީ އަށް އިސްލާހެއް ނުގެނެސް މިބަދަލު ގެނެވެން ނެތް ކަމަށާއި ގާނޫނުއަސާސީ ބުނާގޮތުން ވެރިކަމުގެ ދައުރު ބަދަލުކުރާކަމުގައިވާނަަމަ ރައްޔިތުންގެ ފެންނަ ނުފެންނަ ވޯޓަކަށް ދާންޖެހޭ ކަމުގައި އުޝާމް ވިދާޅުވިއެވެ.

ގާނޫނުއަސާސީގައި ބުނަނީ ރިޔާސީ ދައުރަކީ ފަސް އަހަރު ދުވަސް ކަމަށާއި އެ މުއްދަތުން އެންމެ ދުވަހެއް އުނިކުރާ ކަމުގައިވާ ނަމަވެސް ގާނޫނީ ގޮތުން ސައްހަ ގޮތަކީ ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ގާނޫނުއަސާސީ އިސްލާހުކޮށްގެން ކުރިއަށް ދިއުންކަމުގައި އެޓަރނީ ޖެނެރަލް ވިދާޅުވިއެވެ.

އެހެންކަމުން މިކަމުގައި ގާނޫނުއަސާސީ އިސްލާހުކުރުމަށްޓަކައި ރައްޔިތުންގެ ފެންނަ ނުފެންނަ ވޯޓަކަށް އަހާނެ ކަމަށާއި ރައްޔިތުން އެކަމަށް ތާޢީދުކުރައްވައިފި ކަމުގައިވާނަމަ، 2028 ވަނަ އަހަރު ރިޔާސީ ދައުރު ފެށޭނީ ނޮވެމްބަރު 11 ވަނަ ދުވަހު ކަމުގައި އުޝާމް ފާހަގަކުރެއްވިއެވެ.