ރާއްޖެ ސަރަހައްދަށް ގަވާއިދާ ހިލާފަށް ވަން ބޯޓަކުން އެއް ބިލިއަން ރުފިޔާގެ މަސްތުވާތަކެތި އަތުލައިގަނެފިއެވެ.

ދިވެހި ފުލުހުންގެ ހިދުމަތުން ބޭއްވި ނޫސްވެރިންގެ ބައްދަލުވުމުގައި ހާމަކުރެއްވި ގޮތުގައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ އެމްއެންޑީއެފުން މި ބޯޓު އަތުލައިގަތީ ހދ. މަކުނުދޫ ބޭރުން ކަމަށެވެ.

ނޮވެމްބަރ 23 ވަނަ ދުވަހުގެ ރޭ ދަންވަރުގެ ވަގުތެއްގައި އަތުލައިގަތް މިބޯޓާއި ގުޅޭ މައުލޫމާތު ހިއްސާކުރައްވަމުން ސީޕީ ވަނީ އެ ބޯޓު ކުޅުދުއްފުއްޓަށް ގެންގޮސް، ފުލުހުންނާ ގުޅިގެން ބަލައި ޕާސްކުރުމުގެ ތެރޭގައި 468 ކިލޯގެ މަސްތުވާތަކެތި ފެނުނު ކަމަށެވެ.

މި މަސްތުވާތަކެތީގެ ޕްރިލިމިނަރީ ޓެސްޓު ނަތީޖާތަކުން އޭގެތެރޭގައި ހުރީ 344 ކިލޯގެ ކްރިސްޓަލް މެތާއި 124 ކިލޯގެ ކޮކެއިން ކަމަށް ވެސް ސީޕީ ވިދާޅުވިއެވެ. އަދި މިތަކެތީގެ މަގުމަތީގެ އަގު އެއް ބިލިއަނަށް އަރާކަމަށް ވެސް ވަނީ ވިދާޅުވެފައެވެ.

"މިއީ އަށެންގުތަ ނަމަކަށް ކިޔާ ބޯޓެއް. އަތުލައިގަތް އިރު ބޯޓުގައި ތިބީ ލަންކާއަށް ނިސްބަތްވާ ފަސް ފިރިހެނުން." ސީޕީ ވިދާޅުވިއެވެ.

މީގެއިތުރުން ސީޕީ ވަނީ މި މަސްތުވާތަކެއްޗަކީ ރާއްޖޭގެ ޑްރަގު ނެޓުވޯކަކާ ގުޅިގެން އެތެރެ ކުރަން އުޅުނު ތަކެތިކަން މިހައިތަނަށް ކަށަވަރު ނުވާ ކަމަށާއި މި މައްސަލަ ތަހުގީގު ކުރަމުން އަންނަކަަމަށެވެ.

ރާއްޖޭގެ ކަނޑުގެ އަޑީގައި ފޮރުވާފައި ހުއްޓައި މީގެކުރިން މިއަށްވުރެ ގިނަ މަސްތުވާތަކެތި ހޯދާފައިވީނަމަވެސް މިއީ ފަހުގެ ތާރީހެއްގައި ރާއްޖޭގެ ސަރަހައްދުން އެންމެ ގިނަ އަދަދަކަށް މަސްތުވާތަކެތި އަތުލައިގަތް ފަހަރެވެ.