ފަންނުވެރިކަމަކީ އިޖުތިމާއީ ބަދަލުތައް ގެނައުމަށް މަގުފަހިކޮށްދޭ ޛަރިއްޔާއެއްކަމަށް ހަޔަރ އެޑިއުކޭޝަން މިނިސްޓަރ ޑރ. މަރްޔަމް މާރިޔާ ވިދާޅުވެއްޖެއެވެ.

އެކަމަނާ މިފަދައިން ވިދާޅުވީ ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން "ރެދަން" ގެ ނަމުގައި އިންތިޒާމްކޮށްގެން ކުރިއަށްގެންދާ އާރޓް އެކްޒިބިޝަން ހުޅުވުމަށް ބޭއްވި ރަސްމިއްޔާތުގައެވެ.

މިނިސްޓަރ ވަނީ ފަންނުވެރިކަމަކީ އަޅުގަނޑުމެންގެ މެދުގައި އިހްސާސްތައް އުފައްދައި، ވިސްނުންތައް އެކަކު އަނެކަކަށް ބަދަލުކުރާ ކަމެއް ކަމުގައި ވެސް ފާހަގަކުރައްވާފައެވެ.

"ރެދަން މި ލަފްޒުން ރަމްޒުކޮށްދެނީ އެންމެ އަނދިރި ދަނޑިވަޅުގައިވެސް، ފަންނުވެރިކަމުގެ އަލިކަން އަޅުގަނޑުމެންގެ ދިރިއުޅުމަށް ގެނެސްދޭ ބާރު." މިނިސްޓަރު ވިދާޅުވިއެވެ.

މީގެއިތުރުން މައުރަޒު އިންތިޒާމްކުރި ފަރާތްތަކަށް ޝުކުރއަދާކުރައްވައި ވިދާޅުވީ މިއީ މުސްތަގްބަލުގެ ފަންނާނުންނަށް އެފަރާތްތަކުގެ ހުނަރު ދައްކާލުމަށް ލިބުނު ވަރަށް މުހިންމު ފުރުސަތެއް ކަމަށެވެ.