ވަރލްޑް ލީޑިންގ ޓުއަރިޒަމް ޑެސްޓިނޭޝަން އެވޯޑު ޖެހިޖެހިގެން 5 ވަނަ ފަހަރަށް ރާއްޖެއަށް ލިބިއްޖެއެވެ.

މި އެވޯޑު ރާއްޖެއަށް ހަވާލުކޮށްފައިވަނީ ޕޯޗުގަލްގެ މަދީރާގައި ބޭއްވި މިއަހަރުގެ ވަރލްޑް ޓްރެވަލް އެވޯޑްސްގައެވެ.

2020 ވަނަ އަހަރުން ފެށިގެން ރާއްޖެއިން މި އެވޯޑް ހާސިލުކުރަމުން އަންނައިރު، މިއަހަރު ވެސް ރާއްޖެއިން މި އެވޯޑް ހާސިލުކުރީ 18 ގައުމަކާއި ވާދަކޮށްގެނެވެ.

މީގެއިތުރުން މިއަހަރު ރާއްޖެއިން ވަނީ ތިމާވެއްޓާއި ރަށްޓެހި ދެމެހެއްޓެނިވި ފަތުރުވެރިކަމުގެ މަންޒިލް ނުވަތަ ވޯލްޑް ލީޑިންގ ގްރީން ޑެސްޓިނޭޝަންގެ އެވޯޑު ވެސް ހާސިލުކޮށްފައެވެ. މިއީ މި އެވޯޑް ރާއްޖެއިން ހާސިލުކުރި ފުރަތަމަ ފަހަރެވެ.

މި ދެ އެވޯޑުގެ އިތުރުން ރާއްޖޭގެ ރިސޯޓްތަކަށް ވެސް ވަނީ އެވޯޑުތައް ލިބިފައެވެ.

ފަތުރުވެރިކަމުގެ އޮސްކާގެ ގޮތުގައި ފާހަގަކޮށްލެވޭ ވޯލްޑް ޓްރެވަލް އެވޯޑްސްގައި ރާއްޖެއިން ކޮންމެ އަހަރަކު ވެސް ފަޚުރުވެރި ކާމިޔާބީތައް ދަނީ ހާސިލުކުރަމުންނެވެ.