ކުރިއަށް އޮތް ދުވަސްތަކުގެ ތެރޭގައި ދެ ކޮޅިގަނޑެއްގެ އަސަރު ރާއްޖެއަށް ކުރާނެކަމަށް މޫސުމާއިބެހޭ ގައުމީ އިދާރާ އިން ލަފާކޮށްފިއެވެ.

އެ އިދާރާ އިން ވިދާޅުވީ ބޭ އޮފް ބެންގާލްގައި އުފެދިފައިވާ ކޮޅިގަނޑު ކުރިއަށް އޮތް 24 ގަޑިއިރުތެރޭގައި އިތުރަށް ބާރު ގަދަވެ، ބާރުގަދަ ކޮޅިގަނޑަކަށް ބަދަލުވާނެކަމަށް ލަފާކުރައްވާ ކަމަށެވެ.

މި ކޮޅިގަނޑު ދަތުރުކުރަމުންދާނެކަމަށް ބެލެވެނީ ހުޅަނގުއުތުރަށް، އިންޑިއާގެ ޓެމިލްނާޑް- ސްރީލަންކާ އައްސޭރިފަށާ ދިމާލަށް ކަމަށް ވެސް އެ އިދާރާ އިން ވިދާޅުވިއެވެ.

މީގެއިތުރުން ރާއްޖޭއާ ދުރުން، ރާއްޖޭގެ އިރުދެކުނުގައި ވެސް ކޮޅިގަނޑެއް އުފެދިފައިވާކަން ފާހަގަކުރައްވައި، މޫސުމާއިބެހޭ ގައުމީ އިދާރާ އިން ވިދާޅުވީ މި ދެ ކޮޅިގަނޑާ ގުޅިގެން ނޮވެމްބަރ 27 ވާ ބުދަ ދުވަހުން ފެށިގެން ފަސް ދުވަހު ރާއްޖޭގެ ސަރަހައްދުގެ ވައިބާރުވާނެކަމަށް ލަފާކުރެވޭ ކަމަށެވެ.

އެ އިދާރާ އިން އިތުރަށް ވިދާޅުވީ އާންމެ ގޮތެއްގައި ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައި ޖެހޭއިރު، އުތުރާއި މެދުރާއްޖެތެރޭގެ އަތޮޅުތަކަށް ވައިޖެހޭނީ ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ކަމަށެވެ.

އެހެންކަމުން، ރާއްޖޭގެ ހުރިހައި ސަރަހައްދެއްގެ ކަނޑުތައް ގަދަވާނެކަމަށް ލަފާކުރެވޭތީ މޫސުމަށް ސަމާލުވެ، ކަނޑުދަތުރުކުރުމުގައި ސަމާލުވުމަށް އެދިލައްވާފައި ވެއެވެ.