ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ލެޕްޓޮޕްތަކެއް ވަގަށް ނަގައިފިއެވެ.

ދިވެހި ފުލުހުންގެ ހިދުމަތުން ވިދާޅުވީ އެޗްޑީސީން 5 ލެޕްޓޮޕް ވަގަށް ނެގި މައްސަލައެއް ޑިސެމްބަރ 23 ވަނަ ދުވަހު އެ އިދާރާ އަށް ހުށަހަޅާފައިވާ ކަމަށެވެ. އަދި އެ މައްސަލ ތަހުގީގުކުރަމުން އަންނަކަމަށެވެ.

ފުލުހުންގެ ތަރުޖަމާން އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން ވިދާޅުވީ އެ މައްސަލަ ފުލުހުންނަށް ހުށަހެޅީ އެޗްޑީސީން ކަމަށެވެ. އަދި ގެއްލިފައިވަނީ ފަރުކޮޅުގައި ހުރި އެޗްޑީސީގެ ޕްރޮޖެކްޓް އޮފީހުން ކަމަށެވެ.

މީގެއިތުރުން އެކަމުގައި ޝައްކުކުރެވޭ މީހާ މިވަގުތު ހުރީ މަސްތުވާތަކެތީގެ މައްސަލައެއްގައި ފުލުހުންގެ ހައްޔަރުގައި ކަމަށެވެ. އަދި ތަހުގީގަށް އޭނާގެ އެއްބާރުލުން ލިބޭ ކަމަށެވެ.

ބައެއް މަސްދަރުތަކުން ބުނަނީ އެޗްޑީސީން 10 ލެޕްޓޮޕް ގެއްލިފައިވާކަމަށެވެ. ނަމަވެސް ޝިފާން ވިދާޅުވީ އެއީ ސައްހަ މައުލޫމާތެއް ނޫން ކަމަށެވެ. އަދި އެ އިދާރާ އަށް ހުށަހަޅާފައިވަނީ 5 ލެޕްޓޮޕް ގެއްލިގެން ކަމަށެވެ.

މި ލެޕްޓޮޕްތައް ވަގަށް ނަގާފައި މިިވަނީ ބިންވެރިޔާ ސްކީމުގެދަށުން ގޯތި ލިބިގފައިނުވާ ފަރާތްތަކަކަށް ގޯތިތަކެއް ދީފައިވާކަމަށް ބުނާ މައްސައެއް ފެންމަތިވެ، އެކަން ތަހުގީގު ކުރަމުން އަންނަދަނޑިވަޅެއްގައެވެ.