އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ރައީސާއި ނައިބު ރައީސް، ސީދާ ރައީސުލްޖުމްހޫރިއްޔާ އައްޔަންކުރައްވާގޮތަށް ގާނޫނަށް ބަދަލު ގެނެސްފިއެވެ.

މިގޮތަށް ބަދަލު ގެނައީ ސަރުކާރުގެ ފަރާތުން ހުށަހަޅުއްވާފައިވާ އެންޓި-ކޮރަޕްޝަން ކޮމިޝަންގެ ގާނޫނަށް އިސްލާހު ގެނައުމުގެ ބިލާއި އިލެކްޝަންސް ކޮމިޝަންގެ ގާނޫނަށް އިސްލާހު ގެނައުމުގެ ބިލު މަޖިލީހުން ފާސްކުރުމުންނެވެ.

ނޮވެމްބަރ 25 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މި ބިލު ފާސްކުރީ 69 މެންބަރުންގެ ވޯޓުންނެވެ.

އެ ދެ ކޮމިޝަންގެ ގާނޫނަށް އިސްލާހު ގެނައުމަށް ނިންމާފައިވަނީ މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް ކޮމިޝަންތަކަށް އައްޔަންކުރާ މެންބަރުންގެ ތެރެއިން އެކޮމިޝަނެއްގެ ރައީސާއި ނައިބު ރައީސް އައްޔަން ކުރުމުގައި ޢަމަލުކުރަމުންދާ އުސޫލު އެއް ހަމަކުރުމުގެ ބޭނުމުގައެވެ.

މި އިސްލާހުތަކުގައި ކޮމިޝަނުގެ ރައީސާއި ނައިބުރައީސް އައްޔަންކުރައްވާނީ އެ ކޮމިޝަނުގެ މެންބަރުންގެ ތެރެއިން ރައީސުލްޖުމްހޫރިއްޔާ ކަމަށް އިސްލާހުގައި ވަނީ ބަޔާންކޮށްފައެވެ. އަދި ރައީސާއި ނައިބު ރައީސް އައްޔަން ކުރެއްވުމަށް ނަންތައް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ ކަމަށް ވެސް ބަޔާންކޮށްފައި ވެއެވެ.

މީގެއިތުރުން ރައީސް މަޖިލީހަށް ހުށަހަޅުއްވާ ނަން ދިރާސާކޮށް މަޖިލީހުން ފާސްކުރަންޖެހޭނެ ކަމަށް ވެސް އިސްލާހުގައި ވަނީ ބަޔާންކޮށްފައެވެ.

ގާނޫނު މިހާރު އޮތްގޮތުން އޭސީސީ އަދި އިލެކްޝަންސް ކޮމިޝަނަށް ވެސް ރައީސާއި ނައިބު ރައީސް އައްޔަން ކުރަނީ އެ ކޮމިޝަނުގެ މެންބަރުންގެ މެދުގައި ނަގާ ވޯޓަކުންނެވެ.