ވެރިކަން ދިފާއުކުރުމަށް ގާނޫނުތަކަށް އިސްލާހު ގެނެސް ކޯޓުތައް ގަޔަށް ހެޔޮވަރު ކުރާއިރު، ވެރިން ވިސްނަން ޖެހޭ ކަމަކީ ވެރިކަމަކީ ތާއަބަދު ދެމި ތިެބވޭނެ ބާރެއް ނޫން ކަން ކަމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ނޮވެމްބަރ 25 ވަނަ ދުވަހުގެ ރޭ ޕީއެންއެފް އިން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ގާނޫނު އަސާސީ އޮޅާލައި، ހުރިހައި ބާރުތަކެއް ރައީސުލްޖުމްހޫރިއްޔާގެ މުށުތެރެއަށްލާ ބާރުކޮށްލާފައިވާ ކަަމަށެވެ. ދެން ސަރުކާރު ޖަވާބުދާރީ ކުރުވަން ރައްޔިތުންނަށް ފަސޭހަ ނުވާނެ ކަމަށް ވެސް ވިދާޅުވިއެވެ.

މީގެއިތުރުން ޑިމޮކްރެސީގެ މަގުގައި ދިވެހީން ކުރި ޖިހާދުގައި އެންމެ ބޮޑަށް ވަކާލާތު ކުރި މީހުން މިއަދު މަންމަން ވެފައިވާ ކަމަށް ވެސް ވިދާޅުވިއެވެ.

ރައީސް ޔާމީންގެ ވާހަކަފުޅުތައް އިޝާރާތްކުރައްވާފައި އެވަނީ، ނިމިިޔަ ހަފްތާގެ ބުދަ ދުވަހު ގާނޫނޫ އަސާސީއަށް ގެނައި ހަ ވަނަ އިސްލާހަށެވެ.

އެ އިސްލާހު މަޖިލިސް ތަޅުމަށް އަންގާރަ ދުވަހު ހުށަހަޅައި، ބުދަ ކޮމިޓީ މަރުހަލާ ނިންމާ ދުވަހުން ދުވަހަށް އިތުރު ޖަލްސާއެއް ބާއްވާ ވަނީ ފާސްކޮށްފައެވެ. އަދި ހަމަ އެ ދުވަހު، ރައީސް އެ އިސްލާހު ތަސްދީގު ވެސް ކުރައްވާފައެވެ.

އެއީ ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު އެ ދައުރުގެ ތެރޭގައި އެ ޕާޓީއަކުން ވަކިވެއްޖެ ނަމަ ނުވަތަ ޕާޓީން ވަކިކޮށްފިނަމަ ނުވަތަ އެހެން ޕާޓީއެއްގެ މެންބަރަކަށް ވެއްޖެނަމަ އެ މީހަކު މަޖިލިހުގެ މެންބަރުކަމުން ވަކިވާނެ ކަމަށް ބަޔާންކޮށްފައިވާ އިސްލާހެވެ.