އޯގާތެރި މުޖްތަމަޢެއް ބިނާކޮށް، އަނިޔާވެރިކަން ނައްތާލުމަށް އެންމެ މުހިންމު އެއް މަސައްކަތަކީ، ދުރާލާ އާއިލާތައް ބާރުވެރި ކުރުން ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

އެކަމަނާ ވަނީ އާއިލާއެއްގެ ތެރޭގައި ހަމަނުޖެހުމާއި، ދަތިކަމާއި، ދެންވެސް އެއާއިލާގެ މެމްބަރުންގެ ރައްކައުތެރިކަމާއި އަމާންކަމަށް ނުރައްކާވެދާނޭ ހާލަތެއް އައިސްފާނޭ ފަދަ އާއިލާތައް ފާހަގަކޮށް، އެފަރާތްތަކަށް ދައުލަތުގެ ހުރިހާ މުއައްސަސާތައް ގުޅިގެން އެކުގައި އެހީތެރިވެ، ރައްކައުތެރި އަމާން އައްސޭރިއަކަށް ގެނެސްދިނުމުގެ މަގްސަދުގައި ވުޒާރާއިން ކުރިއަށް ގެންދެވޭ ދެ ޕްރޮގްރާމަކަށް އަލިއަޅުވާލައްވާފައެވެ.

މިގޮތުން ރައްކާތެރިކަމުގެ ނަޒަރުން ވިސްނައިގެން، ޢާއިލާތަކާއި ދުޅަހެޔޮ މުޖްތަމައެއް ބިނާ ކުރުމަށްޓަކައި، އެންމެހާ ހިއްސާދާރުން ގުޅިގެން މުޖުތަމައުގައި ދިރިއުޅޭ ނާޒުކު ހާލަތްތަކުގައި ދިރިއުޅޭ ފަރާތްތަކަށް ލިބިދޭންޖެހޭ އިޖުތިމާއީ ހިދުމަތްތަކާއި ރައްކާތެރިކަން ކަމާބެހޭ ދާއިރާތަކާއެކު ވިލަރެސްކޮށް ފޯރުކޮށްދެވޭނެ އިންތިޒާމް ހަމަޖެއްސުމަށް ކުރިއަށް ގެންދާ އިބަމަ ޕްރޮގްރާމާ ގުޅޭ މައުލޫމާތު  ހިއްސާކުރެއްވިއެވެ.

މި ޕްރޮގްރާމުގެ މެދުވެރިކޮށް، ނާޒުކު ހާލަތްތަކުގައި ދިރިއުޅޭ ފަރާތްތަކަށް ލިބޭ އަނިޔާ ހުއްޓުވާ، ރައްކާތެރި މުޖުތަމައެއް ކަށަވަރުކޮށް، އާންމު ފަރުދުންނާއި ޢާއިލާތަކާއި މުއައްސަސާތަކުގެ ދެމެދުގައި ގާތް ގުޅުންތައް އުފެއްދުމަށް ގިނަގުނަ މަސައްކަތްތަކެއް ފެށިފައިވާކަން ފާހަގަކުރެއްވިއެވެ.

އެގޮތުން މިއަހަރުގެ މިހާތަނަށް ރާއްޖޭގެ 5 އަތޮޅެއްގެ 37 ރަށެއްގައި އިބަމަ ޤާއިމުކޮށް ޖުމްލަ 194 ހިއްސާދާރުން ވަނީ ތަމްރީނު ކުރެވިފައިވާކަމަށް ވިދާޅުވިއެވެ.

މީގެއިތުރުން އޯގާތެރި މުޖުތަމަޢުއެއް ބިނާކުރުމަށް ރައީސުލްޖުމްހޫރިއްޔާ ގެންގުޅުއްވާ ތަޞައްވުރުގެ ތެރެއިން ރާއްޖޭގެ މީހުން ދިރިއުޅެމުންދާ ހުރިހާ ރަށެއްގައި ތިބި ރައްޔިތުން ގާތަށް ޒިޔާރަތްކޮށް އެމީހުންގެ ހާލުބަލައި، ދައުލަތުގެ ހާއްސަ ސަމާލުކަމާއި ރައްކާތެރިކަމާއި އެހީތެރިކަން ބޭނުންވާ އާއިލާތައް ދެނެގަނެ، ދައުލަތުގެ ރައްކާތެރިކަމުގެ ވިއުގައިގެ ތެރެއިން އެއްވެސް މީހަކު ހަވާސާވެފައި ނުހުންނާނެ ކަން ކަށަވަރު ކުރުމަށް "ހާލު ކިހިނެއް؟" ނަމުގައި މިއަހަރު ތެރޭ ޕްރޮގްރާމެއް ތައާރަފުކޮށް، 12 އަތޮޅެއްގެ 53 ރަށެއްގައި މި ޕްރޮގްރާމް ފަށައި، 22 ރަށެއް އެއްކޮށް ވަނީ ނިންމާލެވިފައިކަމަށް ވެސް ވިދާޅުވިއެވެ.

ހަމަމިއާއެކު ހުޅުމާލެ ދެވަނަ ފިޔަވައްސާއި، ވިލިމާލެ އަދި އަތޮޅުތެރެ ހިމެނޭގޮތަށް މިހާތަނަށް ޖުމުލަ 8027 ގޭބިސީއަށް ޒިޔާރަތްކުރެވި އާއިލާތަކުގެ ހާލު ބަލާފައިވާކަމަށް ވިދާޅުވިއެވެ.

މި ޕްރޮގްރާމަކީ ހުށަހެޅޭ މައްސަލަތަކުގެ އަދަދު މަދުކުރުމަށްޓަކައި އެޅުނު މުހިންމު ފިޔަވަޅެއްގެ ގޮތުގައި ފާހަގަކުރައްވައި، ޕްރޮގްރާމްތަކުގެ ތެރެއިން ވަކި ޖިންސަކަށްވީތީ ކުރާ އަނިޔާއަށް ހުށަހެޅުމުގެ ފުރުސަތު އޮތް އެތައް ފަރާތެއްގެ ހާލަތު ކުރީ ބައިގައި ދެނެގަނެވި، އެ ފަރާތްތަކަށް އެހީތެރިވުމުގެ ފުރުސަތު ލިބިގެންދާ ކަމަށް ޑރ. ޢާއިޝަތު ޝިހާމް ވިދާޅުވިއެވެ.