ރާއްޖޭގެ ދެކުނާއި މެދުރާއްޖެތެރެއަށް މޫސުން ގޯސްވާނެ ކަމަށް ލަފާކުރެވޭތީ، އެކަމަށް ސަމާލުވުމަށް މޫސުމާއިބެހޭ ގައުމީ އިދާރާ އިން އިލްތިމާސްކޮށްފިއެވެ.

އެ އިދާރާ އިން މިއަދުގެ އިރުއޮއްސި 6 ޖެހުމާއި ހަމައަށް ނެރެފައިވާ މޫސުމީ ބުލެޓިންގ ގައި ބުނެފައިވަނީ ރާއްޖޭގެ ދެކުނާއި މެދުރާއްޖެތެރޭގެ އެކިހިސާބުތަކަށް ވިއްސާރަކުރުމާއެކު، ގުގުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހޭނެކަމަށް ލަފާކުރެވޭ ކަމަށް ވެސް ބުނެފައި ވެއެވެ.

މީގެއިތުރުން އުތުރުގެ ބައެއް ރަށްތަކަށް ގުގުރުމާއެކު ކެރީގެ އަސަރުކުރާނެ ކަަމަށް ވެސް ވަނީ ލަފާކޮށްފައެވެ.

ވައިޖެހޭނެކަަމަށް ލަފާކޮށްފައިވަނީ ދެކުނުގެ އަތޮޅުތަކުގައި ހުޅަނގާއި ހުޅަނގުއުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައެވެ. އަދި އެހެންއަތޮޅުތަކަށް ހުޅަނގުއުތުރާއި އުތުރުން ގަޑިއަކު 5 މޭލާއި 15 މޭލަށެވެ.

މޫސުމާއިބެހޭ ގައުމީ އިދާރާ އިން ބުނީ ވިލާގަނޑުގައި ގަޑިއަކު 35 މޭލަށް ވައި ގަދަވުން އެކަށީގެންވާ ކަމަށެވެ.

ރާއްޖޭގެ ކަނޑުތައް ދެކުނުގެ އަތޮޅުތަކުގައި ގަދަވިނަމަވެސް، އެހެންހިސާބުތަކުގައި އާދައިގެވަރަކަށް މަޑުވާނެ ކަމަށް ވަނީ ލަފާކޮށްފައެވެ. ނަމަވެސް ވިލާގަނޑުގައި ގަދައިރު، ދެކުނުގެ އަތޮޅުތަކުގައި ރާޅުގެ އުސްމިން ހުންނާނީ ތިން ފޫޓާއި ހަ ފޫޓަށް ކަމަށާއި އެހެން ސަރަހައްދުތަކުގައި ހުންނާނީ ދެ ފޫޓާއި ފަސް ފޫޓަށް ކަަމަށް ވެސް ލަފާކޮށްފައި ވެއެވެ.