މާލޭގެ ފުރުގާން މިސްކިތަށް ގެއްލުންދިން މައްސަލައިގާ މީހަކު ހައްޔަރުކޮށްފިއެވެ.

މި ނޮވެމްބަރ މަހުގެ 23 ވީ ހޮނިހިރު ދުވަހުގެ ރޭ އެ މިސްކިތަށް ގެއްލުން ދީފައިވާ މައްސަލައިގާ ހައްޔަރުކޮށްފައިވަނީ އުމުރުން 30 އަހަރުގެ ދިވެހި ފިރިހެނެކެވެ.

ދިވެހި ފުލުހުންގެ ހިދުމަތުން ވިދާޅުވީ އެ މައްސަލައިގާ ހައްޔަރުކުރީ ގ. މާލެހިޔާ, 2-02-13, ނައުޝާދު މޫސާ ކަމަށެވެ. އަދި އޭނާ ހައްޔަރުކުރީ ނޮވެމްބަރ 25 ވަނަ ދުވަހު ކަމަށެވެ.

އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ނޮވެމްބަރ 26 ވަނަ ދުވަހު ހާޟިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވާ ކަމަށް ވެސް ފުލުހުން ވިދާޅުވެއެވެ.

ފުރުގާން މިސްކިތުގެ ހަތިމުތައް އުކައިލާ، ގެއްލުންތަކެއް ދީފައިވާކަން މީސްމީޑިއާގައި ހިއްސާކުރެއްވީ ޝެއިޚް އާދަމް ނިޝާން ޢަލީ އާދަމް އެވެ. އޭނާގެ ފޭސްބުކްގައި ހާމަކުރައްވާފައިވާ ގޮތުގައި އެދުވަހުގެ ފަތިސް ނަމާދު ކުރިން ވަނީ ފުރްޤާން މިސްކިތުގެ ފަހަތުގައި ހުރި މުސްޙަފްތައް މުޅިތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ތަޅާ ހިމުންކޮށްލާފައިވާ ކަމަށެވެ. އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް އުކާލާފައިވާ ކަމަށެވެ.

މިކަން ކޮށްފައިވަނީ އެ މިސްކިތުގައި އަބަދުހެން، ނަމާދު ގަޑިތަކުގައި ވެސް ނިދާފައި އޮންނަ “ބުއްދިފިލާ ގޮސްފައިވާ” ޒުވާނެއް ކަމަށް ވެސް ވިދާޅުވެފައި ވެއެވެ. އަދި މީގެ ކުރިން އެތައް ފަހަރަކުވެސް މީނާ ވަނީ މުސްޙަފްތައް އުކާލުމާއި މިފަދަ އެތައް ކަމެއް އެ މިސްކިތުގައި ކޮށްފައިކަން ވެސް ޝެއިޚް ވަނީ ފާހަގަކުރައްވާފައެވެ.

"މިވަރު ކުރަމުންދާއިރު މިސްކިތްތަކުގައި ކެމެރާ ހަރުކޮށްގެން 24 ގަޑިއިރު، މާލެ ސިޓީ ކައުންސިލްއިން ބަލަން ތިބޭ ތިބުމުގެ އެއްވެސް ފައިދާއެއް އެބައޮތްތޯއެވެ؟." ފޭސްބުކްގައި ލިޔުއްވާފައިވާ ޕޯސްޓުގައި ވެއެވެ.

މީގެއިތުރުން ކީރިތި ޤުރްއާނަށާއި، الله ގެ ގެކޮޅުގެ ޙުރުމަތް ކަނޑައިގެން އެތައް ފަހަރަކު މީނާގެ މައްސަލަ ފުލުހަށް ރިޕޯޓު ކުރެވިފައިވާއިރު މިކަމަށް އެޅޭނެ ފިޔަވަޅެއް މިދައުލަތުގައި ނެތީތޯ އާއި މިއީ އިންތިހާއަށް ހިތާމަހުރި ކަންކަމެއް ކަމުގައި ވެސް ވަނީ ފާހަގަ ކުރައްވާފައެވެ.

ޝެއިޚް އިތުރަށް ވިދާޅުވީ މިމައްސަލަ ޕޮލިހަށް ރިޕޯޓުކުރުމުން އެބޭފުޅުން ވަނީ ފަތިސް ނަމާދު ފަހުން ވަޑައިގެން މައުލޫމާތު އޮޅުން ފިލުވައި އަދި ފޮރެންސިކް ޑިޕާޓްމެންޓްގެ ބޭފުޅުން ވަޑައިގެން ފޮޓޯ ނަންގަވާ ހައްދަވާފައިވާ ކަމަށެވެ.

މިކަމާއިގުޅިގެން ދިވެހި ފުލުހުންގެ އިދާރާ އިން ވިދާޅުވީ މި މައްސަލަ ފުލުހުންނަށް އެދުވަހުގެ ހެނދުނުގެ ވަގުތެއްގައި ރިޕޯޓުކޮށްފައިވާ ކަމަށާއި އެ މައްސަލަ ތަހުގީގުކުރަން ފަށާފައިވާ ކަމަށެވެ.