ދެ ބޭހެއްގައި ކެމިކަލް މާއްދާތަކެއް އެކުލެވޭތީ ރާއްޖެ އެތެރެކުރުމާއި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.

އެ އޮތޯރިޓީން ވިދާޅުވީ ރާއްޖޭގެ މާކެޓުގައި ލިބެން ހުންނަ ބޭހަކީ ފެންވަރު ރަނގަޅު ރައްކާތެރި ބޭސްކަން ކަށަަވަރުކުރުމަށްޓަކައި ކުރަމުން އަންނަ މަސައްކަތުގެ ތެރެއިން ތަދުކަނޑުވަން ބޭނުންކުރާ ދެ ބޭހަކުން ނުރައްކާތެރި ކެމިކަލްގެ މާއްދާއެއް ފެނިފައިވާ ކަމަށެވެ. އަދި އެއީ ޑައިއީތައިލިން ގްލޯއިކޯލް އާއި އިތައިލީން ގްލައިކޯލް ކަމަށް ވިދާޅުވިއެވެ.

އެމްއެފްޑިއޭ އިން ވިދާޅުވީ ކެމިކަލް ފެނުނީ ޕާކިސްތާނުގެ އެފްރޯޒް ކެމިކަލް އިންޑަސްޓްރީސް އިން އުފައްދާ މެފްނެކް ސުސްޕެންޝަންގެ 50 މިލިގްރާމް (މެފެނަމިކް އެސިޑް) އަދި މެލޭޝިއާގެ ކޯޓްރާ ފާމާއިން އުފައްދާ އެކްސެލް މެފެނެމިކް އެސިޑް ސަސްޕެންޝަން 125 މިލިގްރާމް (މެފެނެމިކް އެސިޑް) އިން ކަމަށެވެ.

އެ ދެ ބޭހުގެ ކޮންފާމެޓްރީ ޓެސްޓު ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުންދާ ކަމަށް ވެސް އެ އިދާރާ އިން ވަނީ ހާމަކުރައްވާފައެވެ. އަދި އެ އިދާރާ އިން ވަކި ގޮތެއް އަންގަންދެން އެ ދެ ބޭސް ރާއްޖެއަށް އެތެރެކުރުމާއި ވިއްކުމާއި ބޭނުން ކުރުން ވަގުތީ ގޮތުން މަނާ ކޮށްފައިވާ ކަމަށް ވިދާޅުވިއެވެ.

އެހެންކަމުން މިވަގުތު ބޭސްފިހާރަތަކާއި ބޭސް ގުދަންތަކުގައި ހުރި އެ ދެ ބޭސް ސްޓޮކާއި ވަކިކޮށް ބެހެއްޓުމަށް ވެސް ވަނީ އަންގާފައެވެ.

ބޭސް ވިއްކާ، ބޭސް ގަންނަ އެންމެހައި ރައްޔިތުން އެކަމަށް ހާއްސަ ސަމާލުކަމެއް ދިނުމަށް އަދި އިތުރު މައުލޫމާތު ހޯދަމަށް ހޮޓްލައިން 7200321 ނަންބަރަށް ގުޅުމަށް އެމްއެފްޑީއޭ އިން އެދިލައްވާފައި ވެއެވެ.