މިއަހަރުގެ މިހައިތަނަށް 1.8 މިލިއަން ފަތުރުވެރިން ރާއްޖެ އައިސްފައިވާކަމަށް ތަފާސްހިސާބުން ދައްކައިފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުގައި ނޮވެމްބަރ 24 ވަނަ ދުވަހުގެ ނިޔަލަށް 1،803،823 ފަތުރުވެރިން ވަނީ ރާއްޖެ އައިސްފައެވެ.

މިއީ ފައިބެއަހަރުގެ މި މުއްދަތާއި އަޅާބަލާއިރު 9.2 އިންސައްތައިގެ ކުރިއެރުމެއް ކަމަށާއި އެ އަހަރުގެ މި މުއްދަތުގައި ޒިޔާރަތްކޮށްފައިވަނީ 1،651،706 ފަތުރުވެރިން ކަމަށް މިނިސްޓްރީން ވިދާޅުވެއެވެ.

މީގެއިތުރުން ދުވާލަކު އެވްރެޖްކޮށް ރާއްޖެއަށް5،483 ފަތުރުވެރިން ޒިޔާރަތްކުރާ ކަމަށާއި ކޮންމެ ފަތުރުވެރިއަކު ވެސް އެވްރެޖްކޮށް ހަތް ދުވަސް ހޭދަކުރާ ކަަމަށް ދައްކައެވެ.

މިއަހަރުގެ މިހައިތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމަކަށް ޗައިނާ ވާއިރު، އެގައުމުން 248،564 ފަތުރުވެރިން އައސިްފައި ވެއެވެ. އަދި ދެވަނައަށް އެންމެ ގިނަ ފަތުރުވެރިން ރަޝިއާ އިން އައިސްފއިވާއިރު، އެއީ 202،136 އެވެ.

ތިންވަނައިގައި އިނގިރޭސިވިލާތް އޮތީ 156،944 ފަތުރުވެރިންނާއެކުގައެވެ.

ރާއްޖޭގައި ފަތުރުވެރިންނަށް ހިދުމަތްދިނުމަށް 171 ރިސޯޓާއި 14 ހޮޓަލާއި 902 ގެސްޓްހައުސް އަދި 155 ސަފާރީ ރަޖިސްޓްރީކޮށްފައި ވެއެވެ.