"ގެދޮރުވެރިޔާ" ސްކީމްގެ ދަށުން ފުލެޓުތައް ދިނުމުގައި ރައްޔިތުންގެ މަޖިލީހުންގެ މެންބަރުންގެ އެއްވެސް ނުފޫޒެއް ނުފޯރާކަަމަށް ހައުސިންގ މިނިސްޓްރީން ހާމަކުރައްވައިފިއެވެ.

އެ މިނިސްޓްރީން މިފަދައިން ބުނީ ފްލެޓުތައް ދިނުމުގައި މަޖިލިސް މެމްބަރުން ނުފޫޒު ފޯރުވާ ކަމަށްބުނެ މީސްމީޑިއާގައި ފަތުރަމުންދާ ވާހަކަތަކަށް އިޝާރާތްކުރައްވައެވެ.

ހައުސިންގ މިނިސްޓްރީން ނެރުއްވި ބަަޔާނުގައި ވަނީ އާންމުންގެ ހިތްތަކުގައި އެ މިނިސްޓްރީއާ މެދު ނުބައި ތަސައްވުރެއް އުފެދޭގޮތަށް ހަގީގަތާ ހިލާފު ވާހަކަތަކެއް ސޯޝަލް މީޑިއާގައި ފަތުރަމުންދާ ކަމަށެވެ. އަދި އެ ސްކީމާ ގުޅިގެން ކުރިއަށްގެންދާ ރީ އިވެލުއޭޝަންގެ މަސައްކަތަށް މަޖިލިސް މެންބަރުންނާއި ބައެއް ސިޔާސީ ފަރާތްތަކުން ނުފޫޒު ފޯރުވާ ކަމަށްބުނެ ރައްޔިތުންގެ ހިތްތަކުގައި ނުތަނަވަސްކަން އުފެދޭ ގޮތަށް ފަތުރަމުން ދަނީ ކަނޑައެޅިގެން ހަގީގަތާ ހިލާފު ޚަބަރުތަކެއް ކަމަށެވެ.

ހައުސިންގ މިނިސްޓްރީގެ ބަޔާނުގައި އިތުރަށް ބުނީ މިނިސްޓްރީގެ މަގްސަދަކީ މި ސްކީމުގެ ދަށުން ފުލެޓުތައް ލިބިގެންދާނީ އެންމެ ހައްގުވެރި ފަރާތްތަކަށް ކަމުގައި ކަނޑައެޅިގެން ދިއުން ކަމަށެވެ.

"އެ މަސައްކަތަކީ ގިނަ އަދަދެއްގެ ރައްޔިތުންނެއްގެ ބޯހިޔާވަހިކަމުގެ އުންމީދުތަކާ ގުޅިފައިވާ ވަރަށް ހައްސާސް މައްސަލައެއް ކަމަށްވާތީ، އެކަމުގައި މިނިސްޓްރީގެ ރަސްމީ ބަހެއް ހޯދުމެއްނެތި، ސިޔާސީ ބޭނުމަށް ހަގީގަތާ ހިލާފު ޚަބަރު ނުފެތުރުމަށް އިލްތިމާސްކުރަމެވެ." ބަޔާނުގައި ވެއެވެ.

ނިމިދިޔަ އެމްޑީޕީ ސަރުކާރުގެ "ގެދޮރުވެރިޔާ" ސްކީމްގެ ދަށުން ފްލެޓު ލިބުނު މީހުންގެ ދާއިމީ ލިސްޓެއް މިމަހުގެ ކުރީކޮޅުގައި ނެރެ، އެއަށް ޝަކުވާ ހުށަހެޅުމުގެ ފުރުސަތު ހުޅުވާލާނެ ކަމަށް ހައުސިންގ މިނިސްޓަރު ޑރ. އަލީ ހައިދަރު ވަނީ ވިދާޅުވެފައެވެ. އެހެން ނަމަވެސް، ލިސްޓު ނެރުން ވަނީ ފަސްކޮށްފައެވެ.

އެ މިނިސްޓްރީން ލިސްޓު ނެރުން އަނެއްކާ ވެސް ފަސްކޮށްފައިވަނީ އެ މަސައްކަތަށް އިތުރު ވަގުތު ބޭނުންވާތީއެވެ.