ރާއްޖޭގައި ހެލިކޮޕްޓަރު އޮޕަރޭޓް ކުރަން ފެށޭނީ އަންނަ އަހަރުގެ މާރޗް މަހުގެ ތެރޭގައި ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޕީއެސްއެމް ނިއުސް އިން ގެނެސްދޭ "ހަފްތާ 52" ޕްރޮގްރާމްގައި ވާހަކަދައްކަވަމުންނެެވެ.

މިނިސްޓަރު ވަނީ ހެލިކޮޕްޓަރު އޮޕަރޭޓުކުރާ ފަރާތަކާއެކު ސޮއިކުރުމުގެ މަސައްކަތްތައް ކުރިއަތް އޮތް 10 ނޫނީ 15 ދުވަސް ތެރޭގައި ކުރިއަށްދާނެކަން ވެސް ހާމަކުރައްވާފައެވެ. 

ރާއްޖޭގައި އެ ހިދުމަތް ފަށާނީ ސިވިލް އޭވިއޭޝަންގެ ހުރިހައި މިންގަނޑަކަށް ފެތޭގޮތަށް ކަމަށާއި ރާއްޖޭގައި އޮޕަރޭޓް ކުރަނީ، އިނގިރޭސިވިލާތުގެ ސީއޭ ރިކޮމަންޑޭޝަންތަކާއެކު، ސަލާމަތީ ގޮތުން އެންމެ ރަނގަޅު ފެންވަރުގެ ހެލިކޮޕްޓަރުތައްކަން ވެސް ފާހަގަކުރެއްވިއެވެ.

މީގެއިތުރުން ދަތުރުތައް ފެށުމުން އެއްރަށުން އަނެއް ރަށަށް ނުވަތަ މާލެއަށް ގެންނަންޖެހޭ ބަލި މީހުން ކަންތައްތައް ވެސް ފެށިގެންދާނެކަމަާއި ރޭގަނޑު ޓޫރިސްޓުން އޮޕަރޭޓް ކުރުމުގައި ހުރި ދަތިތަކަށް ވެސް ހައްލެއް ލިބޭނެ ކަމަށް ވިދާޅުވިއެވެ.

ރާއްޖޭގައި ހެލިކޮޕްޓަރުގެ ހިދުމަތް ދޭން ނިންމާފައިވަނީ އިމަޖެންސީގެ ކުއްލި ހާލަތްތަކުގެ ހިދުމަތް ދިނުމަށާއި، ރާއްޖޭގެ ފަތުރުވެރިކަމުގެ ސިނާއަތް ކުރިއެރުވުމަށެވެ.

ހަމަމިއާއެކު ހިދުމަތް ދިނުމަށް އެއްބަސްވުން އެކުލަވާލާ ފަރާތަކަށް 10 އަހަރުގެ މުއްދަތަކަށް ރާއްޖޭގެ އެކި ސަރަހައްދުތަކަށް ފަތުރުވެރިން އުފުލައި ފަތުރުވެރިކަމުގެ ސިނާއަތު ކުރިއެރުވުމަށް ހުއްދަ ދިނުމަށް ވެސް ނިންމާފައި ވެއެވެ.

ރާއްޖޭގައި ހެލިކޮޕްޓަރުގެ ހިދުމަތް ދިނުމަށް ޝައުގުވެރިވާ ފަރާތްތަކުން އެކަމަށް އެދި ހުށައެޅުމަށް މިއަހަރު އޮގަސްޓް މަސްތެރޭގައި ހުޅުވައިލުމުން ބައިނަލްއަގްވާމީ 36 ކުންފުންޏަކުން އެ ޝައުގުވެރިކަން ވަނީ ފާޅުކޮށްފައެވެ.