އުރީދޫ މޯލްޑިވްސް އިން ކުރިއަށް ގެންދަމުންދާ ގްރޯ ވިތް އުރީދޫގެ ސެޝަނެއް އައްޑު އަތޮޅު ފޭދޫގައި ބާއްވައިފިފިއެވެ.

އިސްރަށްވެހިންނަށް ހާއްސަކޮށްގެން ކުރިއަށް ގެންދިޔަ މި ސެޝަނުގައި ގޭގައި ގަސްއިންދުމާއި ހެއްދުމަށް ކުރެވިދާނެ ކަންކަން ކިޔައިދީ، ޢަމަލީ ސެޝަނެއް ވެސް ވަނީ ކުރިއަށް ގެންގޮަސްފައެވެ.

ފޭދޫ އަވަށު އޮފީހާ ގުޅިގެން ކުރިއަށް ގެންދިޔަ މި ސެޝަން ނަގައިދިނީ އުރީދޫގެ "ގްރޯ ވިތް އުރީދޫ" ބްރޭންޑް އެމްބެސެޑަރ ރަމްޒީ ހުސައިން އެވެ.

މި ހަރަކާތުގައި އުމުރުން ދުވަސްވީ މުޖުތަމައުގެ ބޭނުންތަކަށް އަމާޒުކޮށްގެން ޢަމަލީ ސެޝަނެއް ކުރިއަށް ގެންދެވި ބައިވެރިންނާއިއެކު މަޝްވަރާކޮށް، ސުވާލުތަކަށް ޖަވާބު ދިނުން ކުރިއަށް ދިޔައެވެ. އަދި މިކަހަލަ އެކްޓިވް ހަރަކާތްތަކުން ޖިސްމާނީ އަދި ނަފްސާނީ ދުޅަހެޔޮކަމަށް ލިބިދޭ ފައިދާތަކަށް އަލިއަޅުވާލާފައިވެއެވެ.

މިއީ "ގްރޯ ވިތް އުރީދޫގެ" ސިލްސިލާ ހަރަކާތްތަކުގެ ތެރެއިން މިއަހަރު ބޭއްވި ތިން ވަނަ ހަރަކާތެވެ.

މިއީ އުމުރުން ދުވަސްވީ މީހުންނަށް ހާއްސަކޮށްގެން އިންކްލޫސިވް އިވެންޓްތައް ބޭއްވުމަށް އުރީދޫއިން ކުރަމުންދާ މަސައްކަތުގެ ދަށުން، މުޖުތަމައުގައި ހަރަކާތްތެރި ފަރާތްތަކުގެ ގޮތުގައި ދެމިތިބުމަށް ހިތްވަރުދިނުމުގެ ގޮތުން ކުރިއަށް ގެންދާ ހަރަކާތެކެވެ.

"ގްރޯ ވިތް އުރީދޫ" ސިލްސިލާގެ ދަށުން ރާއްޖޭގެ އެކި ރަށްރަށަށް ޒިޔާރަތްކޮށް ދެމެހެއްޓެނިވި އުސޫލުތައް ކުރިއަރުވައި ބައިވެރިންގެ މެދުގައި ގުޅުން ބަދަހިކުރުމުގެ ގިނަ ހަރަކާތްތަކެއް ވަނީ ރޭވިފައެވެ. މި ސިލްސިލާގައި އެކި އުމުރުފުރާތަކަށް ހާއްސަކޮށްގެން ޕްރޮގްރާމްތައް ކުރިއަށް ގެންދެވޭނެއެވެ.

އުމުރުން ދުވަސްވީ މީހުން ހިމެނޭ ގޮތަށް ތަފާތު ގުރޫޕްތަކަށް ހިދުމަތް ދޭ ގޮތަށް ހަރަކާތްތައް ފަރުމާކޮށް، އިންކްލޫސިވް ކޮމިއުނިޓީތައް ބިނާކުރުމަށް އުރީދޫ މޯލްޑިވްސް އިން އަބަދުވެސް މަސައްކަތް ކުރެއެވެ.

މައުލޫމާތު ހިއްސާކުރުމާއި ޢަމަލީ ހުނަރުގެ ޒަރިއްޔާއިން މި ޑިމޮގްރަފިކް ބާރުވެރިކުރުވައި، އެ މީހުންގެ ދިރިއުޅުމުގެ ފެންވަރު މަތިކޮށް ތިމާވެށީގެ ދެމެހެއްޓެނިވި ކަންކަމަށް އެހީތެރިކަން ފޯރުކޮށްދިނުމުގެ މަގު ފަހިކޮށްދިނުމަކީ ކުންފުނީގެ އަމާޒެކެވެ.