މާލޭގެ މަގުތައް މަރާމާތުކޮށް ފެންބޮޑުވުމުގެ މައްސަލަ ހައްލުކުރުމުގެ މަސައްކަތް ފަށައިފިއެވެ.

މިއީ މާލޭގެ މަގުތައް މަރާމާތުކޮށް، ފެންބޮޑުވުމުގެ މައްސަލަ ހައްލުކުރުމަށް ކުރަމުން ގެންދާ މަސައްކަތުގެ ތެރެއިން މާލޭ ސިޓީ ކައުންސިލުން ފެށި މަސައްކަތެކެވެ.

އެގޮތުން ހަވީރީހިނގުން، ޗާނދަނީ މަގު، މަޖީދީ މަގު ހެދުމުގެ މަސައްކަތް މިހާރުވަނީ ފަށާފައެވެ.

މިކަމާއި ގުޅިގެން މާލޭ ސިޓީގެ މޭޔަރ އާދަމް އާޒިމް ވިދާޅުވީ މިއީ ރައްޔިތުންނަށް ވަރަށް ބޮޑަށް ދަތިވެފައިވާ މައްސަލައަކަށް ވާތީ، ވީހާ ވެސް އަވަހަށް މި މައްސަލައަށް ހައްލު ހޯދުމަށް މަސައްކަތް ކުރަމުންދާކަމަށެވެ. އަދި މަގުތައް މަރާމާތުކުރުމުގެ މަސައްކަތް ފެށިގެން ކުރިއަށްދާއިރު، އަމީނީމަގާއި ޗާންދަނީމަގު ފަދަ ބޮޑެތި މަގުތައް މަރާމާތުކުރުމަށް ހާއްސަ ސަމާލުކަމެއް ދެއްވާނެ ކަމަށް ވިދާޅުވިއެވެ.

މީގެއިތުރުން މާލޭގެ ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށް ބޭނުވާ ބޮޑެތި ޕަންޕުތައް ހޯދުމަށް އޯޑަރުކޮށްފައިވާ ކަމަށާއި މި ޕަންޕުތައް ކުރިއަށް އޮތް ދެތިން ހަފުތާގެ ތެރޭގައި ލިބޭނެ ކަމަށް އުންމީދުކުރައްވާ ކަމަށް ވެސް ވިދާޅުވިއެވެ.

މޭޔަރު އިތުރަށް ވިދާޅުވީ މި މަސައްކަތްތަކަކީ މާލެ ސިޓީ ކައުންސިލުން އިސްނަގައިގެން ކުރުމަށް ރާވާފައިވާ މަސައްކަތްތަކެއް ކަމަށާއި މާލޭގެ މަގުތައް މަރާމާތުކޮށް ބެލެހެއްޓުމަކީ ކައުންސިލުގެ ޒިންމާއެއް ކަމަށެވެ. އަދި މި މަސައްކަތުގައި ކައުންސިލް މެންބަރުންގެ ފުރިހަމަ އެހީތެރިކަމާއި އެއްބާރުލުން ލިބިވަޑައިގަންނަވަމުންދާ ކަމަށް ވެސް ވިދާޅުވިއެވެ.