އަންނަ 2025 ވަނަ އަހަރަށް ސަރުކާރުން ހުށަހެޅި 56.6 ބިލިއަން ރުފިޔާގެ ބަޖެޓު ރައްޔިތުންގެ މަޖިލީހުން ފާސްކޮށްފިއެވެ.

ނޮވެމްބަރ 27 ވީ ބުދަ ދުވަު ބޭއްވި ޖަލްސާގައި ބަޖެޓު ފާސްކޮށްފައިވަނީ ވޯޓުގައި ބައިވެރިވި 81 މެންބަރުންގެ ތެރެއިން 70 މެންބަރުންގެ ވޯޓާއެކުގައެވެ. ބަޖެޓު ފާސްކުރަން ނުފެންނަ ކަމަށް 11 މެންބަރުން ވަނީ ވޯޓު ދެއްވާފައެވެ.

ބަޖެޓު ބަހުސްގައި ވާހަކަދައްކަވަމުން ޕީއެންސީގެ މެންބަރުން ވިދާޅުވެފައިވަނީ މި ބަޖެޓަކީ ސަރުކާރުގެ މަގްސަދުތައް ހާސިލްވާނެ ބަޖެޓެއް ކަމަށެވެ. އަދި ހުރިހައި ރަށެއްގައި ވެސް މަޝްރޫއުތައް ހިންގޭނެ ފަދަ ފުރިހަމަ ބަޖެޓެއް ކަމަށެވެ.

މީގެއިތުރުން މާލީ މައްސަލަތަކުން އަރައިގަނެވޭނެ ފަދަ ބަޖެޓެއް ކަމަށް ވެސް ވަނީ މެމްބަރުން ވިދާޅުވެފައެވެ.

އެހެންނަމަވެސް ސިޔާސީ އިދިކޮޅު ފަރާތްތަކުން ބުނަމުން ދަނީ ބަޖެޓުގައި ވަކިވަކި މަޝްރޫއުތަކުގެ ތަފްސީލެއް ނެތުމަކީ ވަރަށްބޮޑު ކަންބޮޑުވުމެއް ކަމަށެވެ. އަދި ސަބްސިޑީތަކަށް ކަނޑައެޅި އަދަދު މަދުވުމަކީ ވެސް ބޮޑު މައްސަލައެއް ކަމަށެވެ.