މާލެ ސިޓީ ކައުންސިލުން ވިލިމާލޭގެ ބޯޓްޔާޑު ސަރަޙައްދު ސާފުކުރުމުގެ މަސައްކަތް ފަށައިފިއެވެ.

މި މަސައްކަތް ކުރިއަށްދަނީ އެ ކައުންސިލްގެ މުނިސިޕަލް ޓީމާއި، ކޮމިއުނިޓީ އެންގޭޖްމަންޓް އަދި ވޭސްޓް މެނޭޖުމެންޓް ޓީމުތައް ގުޅިގެންނެވެ.

ސެގްމަންޓްތަކަކަށް ބަހާލައިގެން މި މަސައްކަތްތައް ކުރިއަށްގެންދާއިރު، ފުރަތަމަ ސެގްމަންޓާއި ދެވަނަ ސެގްމެންޓުގެ މަސައްކަތް ފަށައި، މަގުތަކާއި ހުސްބިންތަކުގައި ހުރި ކުނި ނަގައި ސާފުކުރުމުގެ މަސައްކަތް މިހާރު ވަނީ ނިންމާލާފައެވެ.

މި ދެ ދުވަހުގެ ތެރެއިން ފުރަތަމަ ދުވަހު 11.1 ޓަނުގެ ކުނި އަދި ދެވަނަ ދުވަހު 9.7 ޓަނުގެ ކުނި ނަގާފައިވެއެވެ.

މި ސަރަޙައްދުން ނެގުނު ކުނީގެ ތެރޭގައި ޕްލާސްޓިކް، ދަގަނޑު، ލަކުޑި އަދި އުޅަނދުފަހަރު މަރާމާތުކުރުމަށް ބޭނުންކުރާ އެހެނިހެން ތަކެތި ހިމެނެއެވެ.

މިއީ ރަށުތެރެ ސާފުކޮށް ބޭއްވުމަށާއި، ހުރިހާ ފަރާތްތަކެއްގެ އެއްބާރުލުން ހޯދައިގެން މަސައްކަތް ކުރުމަށް އިސްކަންދީގެން ކުރިއަށްގެންދާ މަސައްކަތެކެވެ. އަދި ކުރިއަށް އޮތްތާގައި ވެސް ބޯޓުޔާޑު ސަރަހައްދު ބޭނުންކުރުމުގައި، ވަކި އުސޫލުތަކެއް ކަނޑައަޅައި، ކައުންސިލުގެ ހުއްދައާއެކު އެ ސަރަހައްދު ބޭނުންކުރެވޭނެ ގޮތް ހަމަޖެއްސުމަށް ދަނީ ރާވަމުންނެވެ.