ކުޑަކުދިންގެ މައުލޫމާތު އާންމުކުރާއިރު، އެކުދިންގެ ކަރާމާތާއި ރައްކާތެރިކަން ނެގެހެއްޓުމަށް ހާއްސަ ސަމާލުކަމެއް ދިނުމަށް ދިވެހި ފުލުހުންގެ ހިދުމަތުން އިލްތިމާސް ކުރަްއްވައިފިއެވެ.

އެ އިދާރާ އިން ނެރުއްވި ނޫސްބަޔާނެެއްގައި ވަނީ ކުޑަކުދިންގެ ފޮޓޯތަކާއި އެހެނިހެން ޒާތީ މައުލޫމާތު މީސްމީޑިއާގައާއި މީޑިޔާގެ އެހެނިހެން ވަސީލަތްތަކުގައި ޝާއިއުނުކުރުމަށް އިލްތިމާސްކުރައްވާފައެވެ. އަދި ކުޑަކުދިންނާ ގުޅޭ މައުލޫމާތު ހާމަކުރުމުގައި ގާނޫނީ އިމުގެ ތެރެއިން ޢަމަލުކުރުމަށް މީޑިޔާތަކަށާއި އާންމު ރައްޔިތުންނަށް ފުލުހުން ވަނީ އިލްތިމާސްކުރައްވާފައެވެ.

ފުލުހުން މިފަދަ ބަޔާނެއް ނެރުއްވާފައި މިވަނީ މީޑިއާގެ ވަސީލަތްތަކުގައާއި މީސްމީޑިއާގައި ކުޑަކުދިންގެ މައުލޫމާތު އާންމުކުރާއިރު، އެކުދިންގެ ކަރާމާތާއި ރައްކާތެރިކަމަށް އުނިކަން އަންނަފަދަ މައުލޫމާތާއި ތަސްވީރު އާންމުކުރަމުންދާތީ އެކަމުގެ ކަންބޮޑުވުން ފުލުހުން ފާޅުކުރައްވައެވެ.

އެ ބަޔާނުގައި ވަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކުޑަކުދިންގެ ކަރާމާތަށް އުނިކަން އަންނަގޮތަށް އެކުދިންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނެކަމަށް ސާފުކޮށް ބަޔާންކޮށްފައިވާ ކަމަށެވެ.

އެހެންނަމަވެސް ބައެއް މަންސަތަކުގައި ކުޑަކުދިންގެ މައުލޫމާތާއި ތަސްވީރު އެކުދިންގެ ކަރާމާތަށް އުނިކަން އަންނަ ގޮތަށް ފަތުރަމުން ދިއުމަކީ އެކުދިންގެ މަސްލަހަތު ރައްކާތެރިނުކުރެވި، ކުއްޖާ ނުރައްކަލަށް ހުށަހެޅިދާނެކަމެއްގެ ގޮތުގައި ފުލުހުން ދެކޭކަމަށް ބަޔާނުގައި ފާހަގަކުރައްވާފައި ވެއެވެ.

ހާއްސަކޮށް ކުޑަކުދިންގެ ފޮޓޯ މީސްމީޑިޔާގައި ދައުރުވަމުންދިޔުމަކީ އެކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ނޭދެވޭ އަސަރުކޮށްފާނެކަމެއް ކަމުގައުި ފާހަގަކުރެއްވިއެވެ. އަދި މިކަމުގެ ސަބަބުން ކުޑަކުދިން އެކި ބާވަތުގެ އަނިޔާތަކަށް ހުށަހެޅުމުގެ ފުރުސަތު ވެސް އިތުރުވެގެންދާނެ ކަމެއް ކަމުގައި ވަނީ ފާހަގަކުރައްވާފައެވެ.