ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި އެމަނިކުފާނުގެ މޭކަށިގަނޑު ފޫއަޅުވާލައި ރޭޒާ ފުށްތައް ފުއްޕާމެއަށް ވަދެފައިވާ ކަަމަށް ޑރ. ޢަބްދުﷲ ނިޔާފް ވިދާޅުވެއްޖެއެވެ.

ރައީސް ނަޝީދަށް ދިން އެ ހަމަލާއާ ގުޅިގެން ހިންގާ ޝަރީއަތުގައި ކްރިމިނަލް ކޯޓުގައި ހެކިބަސް ދެއްވަމުން ޑރ ނިޔާފު ވިދާޅުވީ ލިވަރ ފޫއަޅުވާލައި، މައި ލޭހޮޅި ތެރެއަށް ވެސް ރޭޒާ ފުށް ވަދެފައިވާ ކަމަށެވެ. އަދި މައި ލޭހޮޅި ތެރޭގައި ރޭޒާފުށް އޮތުމަކީ ފުރާނައަށް ވަރަށް ނުރައްކާވި ކަމެއް ކަމަށެވެ.

މީގެއިތުރުން އެ ނެގުމަށް މަސައްކަތް ކުރިއިރު ނަޝީދުގެ ވިންދު ވެސް ހުއްޓުނު ކަމަށާއި އެހެންނަމަވެސް ސީޕީއާރް ދީގެން ކުރި މަސައްކަތުން އަލުން ވިންދު އައި ކަމަށް ވިދާޅުވެފައެވެ. އަދި ރައީސް ނަޝީދު އެމެޖެންސީ ރޫމަށް ގެނައިރު، ގަމީހުގެ އެއް ފަޅި އާއި ފަޓުލޫނުގެ އެއް ފަޅީގައި ގިނަ އަދަދަކަށް ލޭ ހުރިކަމަަށް ވެސް ވިދާޅުވިއެވެ.

ޑރ. ނިޔާފު އިތުރަށް ވިދާޅުވީ އެމަނިކުފާނުގެ ހަށިގަނޑުން ޖުމުލަ 10 ރޭޒާ ފުކާއި ޕްލާސްޓިކް ކޮޅުތަކެއް ވެސް ނަގަން ޖެހުނު ކަމަށެވެ. އަދި އަތާއި ފައިގައި ހުރި ޒަހަމްތަކުން ލޭ މަނާނުވާތީ، އެ ތަންތަނުގެ ސަރޖަރީ އަވަސްރަން ޖެހުނުކަން ފާހަގަކުރައްވައި، ވަނީ ފައިގެ ފަލަމަސްގަނޑުގެ ދެ ތަނަކުން ރޭޒާފުށްތައް ނަގަން ޖެހުނުކަން ވެސް ފާހަގަކުރައްވާފައެވެ.

މި އޮޕަރޭޝަންގައި 16 ގަޑިއިރު ހޭދަކުރި ކަމަށް ވެސް ޑރ. ނިޔާފު ވިދާޅުވިއެވެ.

މި މައްސަލާގައި ދައުލަތުގެ ފަރާތުން ވަނީ 111 ހެކި ހުށަހަޅާފައެވެ. އޭގެ ތެރޭގައި ނަޝީދަށް ފަރުވާދިން ގިނަ ޑޮކްޓަރުން ވެސް ހިމެނެއެވެ. އެކަމަކު ނަޝީދަށް ލިބުނު އަނިޔާތައް ސާބިތުކޮށްދޭން ދައުލަތުން ހުށަހެޅި ނިޔާފްގެ ހެކިބަހާ ބެހޭގޮތުން ދައުވާ ލިބޭ އެއްވެސް ފަރާތަކުން ސުވާލުކޮށްފައެއް ނުވެއެވެ.

ދައުވާ ލިބޭ ފަރާތްތަކުގެ ވަކީލުން ވިދާޅުވި ގޮތުގައި އެ ދުވަހު ހިނގި ކަންތަކުގައި ނަޝީދަށް އަނިޔާވެފައިވާ ކަމަކީ އެ ފަރާތްތަކުން ދެކޮޅު ހަދާ ކަމެއް ނޫނެވެ.

ނަޝީދަށް ހަމަލާދިން މައްސަލައިގައި ޓެރަރިޒަމްގެ ދައުވާތައް އުފުލާފައިވަނީ ވ. ތިނަދޫ ލަކީ، އަދުހަމް އަހްމަދު، މއ. ފޭރުގޭ، މުޖާޒް އަހުމަދު، ގއ. ކޮނޑޭ ފޮޅޭމާ، ތަހުމީން އަހްމަދު، ނ. މަނަދޫ ނޫރީގެ، އަލީ ހައިޝަމް، ގއ. ވިލިނގިލީ ހުދުރުވާގެ، ފަހުމީ އަލީ، އއ. މާޅޮސް އަސަރީގެ، މުހައްމަދު ނާޒިމް އަދި މ. ކުދެހިގޭ، އިސްހާގު އެވެ.

މީގެތެރެއިން ބޮން ގޮއްވާލި ރިމޯޓު ގެންގުޅުނު އަދުހަމް ދައުވާއަށް އިއުތިރާފުވުމުން ކްރިމިނަލް ކޯޓުން ވަނީ އޭނާ 23 އަހަރަށް ޖަލަށް ލާން ހުކުމްކޮށްފައެވެ.