ކުރީގެ ރައީސް މުޙައްމަދު ނަޝީދަށް ގްލޯބަލް ސިޓިޒަންޝިޕް އެވޯޑު ލިބިވަޑައިގެންފިއެވެ.

މިއީ ތިމާވެއްޓާއި މޫސުމަށް އަންނަ ބަދަލުތަކާއި މުޖުތަމައުއަށް ފައިދާ ހުރި މަސައްކަތްތައް ކުރާ ފަރާތްތަކުގެ އަގު ވަޒަންކުރުމުގެ ގޮތުން ދޭ އެވޯޑެކެވެ.

އެމަނިކުފާނަށް މި އެވޯޑު ހަވާލުކޮށްފައިވަނީ އެމެރިކާގެ ނިއު ޔޯކްގައި އޮތް ރަސްމިއްޔާތެއްގައެވެ.

މިކަމާއިގުޅިގެން އެމަނިކުފާނު މިހާރު ނިސްބަތްވެވަޑައިގަންނަވާ ސިޔާސީ ޕާޓީކަމުގައިވާ ދަ ޑިމޮކްރެޓްސް އިން ނެރުނު ނޫސްބަޔާނެއްގައި ވަނީ ރައީސް ނަޝީދަކީ މުޖުތަމައުގެ ކުރިއެރުމަށް އާދަޔާހިލާފް މަސައްކަތްތަކެއް ކުރައްވާ ބޭފުޅެއްކަން ފާހަގަކުރައްވާފައެވެ.

އެ ބަޔާނުގައި އިތުރަށް ބުނީި ރައީސް ނަޝީދުގެ ހަޔާތްޕުޅު ފާހަގަކުރެވެނީ އިންސާނީ ހައްގުތަކުގެ ދިފާއު އާއި މޫސުމަށް އަންނަ ބަދަލުތަކާ ދެކޮޅަށް ކުރައްވާ މަސައްކަތްޕުޅުތަކުގެ އަގުވަޒަންކޮށް ބައިނަލްއަގުވާމީ ފެންވަރުގައި ލިބިވަޑައިގެންނެވި އެވޯޑްތަކާއި އަގުވަޒަންކުރުންތަކުން ކަމަށެވެ.

2014 ވަނަ އަހަރުން ފެށިގެން ދެމުން އަންނަ ގްލޯބަލް ސިޓިޒަންޝިޕް އެވޯޑަކީ އެކި ގައުމުތަކުގައި ވަޒަންވެރިވުމާއި ރައްޔިތުކަން ހޯދަން ބޭނުން މުއްސަނދިންނަށް އެކަންކަމަށް މަގުފަހިކޮށްދިނުމުގެ އެންމެ ބޮޑު އެއް ކުންފުނި ހެންލީ އެންޑް ޕާޓްނަރސް އިން ދެމުންއަންނަ އެވޯޑެކެވެ. މި ކުންފުނީގެ 60 އޮފީސް ދުނިޔޭގެ އެކި ގައުމުގައި ހިންގާކަމަށް މައުލޫމާތު ލިބެއެވެ.

ރައީސް ނަޝިދަށް މީގެކުރީން ވެސް ވަނީ ބައިނަލްއަގްވާމީ ބައެއް އެވޯޑުތައް ލިބިވަޑައިގެންފައެވެ. އެގޮތުން ޓައިމްސް މެގަޒިންގެ 'ހީރޯސް އޮފް ދަ އެންވާރަމެންޓް' އާއި ފޮރިން ޕޮލިސީ މެގަޒިންގެ ޓޮޕް ގްލޯބަލް ތިންކާސް ހިމެނެއެވެ.