އިސްލާމް ދީނުގެ އަސާސަކާމެދު ޝައްކު އުފައްދައިގެން ނުވާނެ ކަމުގައި ހުކުރު ހުތުބާގައި ބުނެފިއެވެ.

ހުތުބާގައި ބުނީ އިސްލާމްދީނާމެދު ޝައްކާއި ވަހުމުތައް އުފައްދާ ފަތުރަމުންދާ މިޒަމާނުގައި އަބޫބަކުރުފާނު ދެއްކެވިފަދަ ސާބިތުކަމެއް ދައްކާންޖެހޭ ކަމަށެވެ.

އެގޮތުން މީހަކު އެމީހެއްގެ ކޮށި ވިސްނުން ހުއްޖަތަކަށް ހަދައި، މުސްލިމުންގެ ސިކުނޑި ދޮވެލުމަށްޓަކާ ދައްކާ ވާހަކައަކުން ގުރުއާނާއި ސުންނަތުން ސާބިތުވާ، އިސްލާމްދީނުގެ އަސާސަކާ މެދު ޝައްކު އުފައްދައިގެން ނުވާނެކަމަށް ހުތުބާގައި ބުންޏެވެ.

މީގެއިތުރުން އަލްހުލަފާއުއްރާޝިދޫންއަކީ މާތް ނަބިއްޔާގެ ހަލީފާކަން ކުރެއްވި 4 އަސްހާބު ބޭކަލުން ކަމަށްވާ އަބޫބަކުރުގެފާނާއި އުމަރުގެފާނާއި އުސްމާނުގެފާނުގެ އިތުރުން އަލީގެފާނު ކަމަށާއި މި ބޭކަލުންނަކީ ނަބިއްޔާ އެބޭކަލުންނަށް ތަބާވުމަށް އިރުޝާދު ދެއްވާފައިވާ ބޭކަލުންކަން ހުތުބާގައި ފާހަގަކޮށްފައި ވެއެވެ.

"އެބޭކަލުންގެ ސުންނަތުގައި ހިފުމަށް އެ ބޭކަލުންގެ ހަޔާތްޕުޅަށް ނަޒަރު ހިންގައި، ލިބޭ ފިލާވަޅުތަކުގެ އަލީގައި ދިރިއުޅުން ބިނާކުރުން މުހިންމެވެ. މުސްލިމުންގެ އެންމެ ފުރަތަމަ ހަލީފާ އަބޫބަކުރުގެފާނަކީ އީމާންކަމާއި ހެޔޮ ޢަމަލުގައި ނަމޫނާ ބޭކަލެކެވެ. ހެޔޮ ކޮންމެ ކަމެއް ކުރެއްވުމުގައި އެކަލޭގެފާނު ކުރި ހޯއްދަވައެވެ." ހުތުބާގައި ބުންޏެވެ.

ހަމަމިއާއެކު މާތް ނަބިއްޔާގެ އިސްރާ އާއި މިއުރާޖުގެ ހާދިސާގެ ޚަބަރު އެކަލޭގެފާނަށް ލިބިވަޑައިގަތުމުން ވިދާޅުވި ބަސްފުޅުން އެކަން ދޭހަވާ ކަމަށާއި އެ ދަތުރުފުޅުގެ ޚަބަރު ގަބޫލުކުރައްވަން ބައެއް ސަހާބީންނަށް ވެސް ދަތިފުޅުވިއިރު، އަބޫބަކުރުގެފާނު އެވާހަކަ ތެދުކުރެެެއްވިކަން ފާހަގަކުރިއެވެ. އެ އާއެކު، އެކަލޭގެފާނަށް އައްސިއްދީގުގެ ލަގަބު އެރުވުނުކަން ވަނީ ފާހަގަކޮށްފައެވެ.

"އަލްޚުލަފާއުއްރާޝިދޫންގެ ޙަޔާތްޕުޅުން ދަރުސްތަކެެއް" މި މައުޟޫއަށް ތައްޔާރުކޮށްފައިވާ ހުތުބާގައި އިތުރަށް ބުނީ ދީނާ ދުރު ވިސްނުންތައް ގެންގުޅޭ މީހުންނާ މެދު އަހަރެމެންގެ ޒިންމާއަކީ ހެޔޮ ގޮތުގައި ވާހަކަ ދައްކައި، ނަސޭހަތްދިނުން ކަމަށެވެ. އަދި ޝަރުއީ ދަލީލުތަކުންނާއި ބުއްދީގެ ދަލީލުތަކުން ހުއްޖަތް ދައްކައި، ހެޔޮ މަގު ދައްކައިދީ، ﷲ އާ ވަކީލުކުރުން ކަމަށެވެ.

ހިދާޔަތުގެ މަގަށް ތައުފީގު ދެއްވަނީ މާތް ﷲ ކަަމަށާއި ފާފަކުރެވުމަކީ އިސްލާހުގެ މަގާ މެދު މާޔޫސްވާންވީ ސަބަބެއް ނޫން ކަމަށް ވެސް ވަނީ ބުނެފައެވެ. އަދި ކިތަންމެ ބޮޑެތި އަދި ކިތަންމެ ބައިވަރު ފާފަތަކެއް ކުރެވިފައިވީނަމަވެސް، އިސްލާހުވާން ބޭނުންވާ މީހަކަށް އެ މަގު ފަހިވެފައިވާކަން މާތް ﷲ ވަނީ އަންގަވާފައިކަން ހުތުބާގައި ހަނދާންކޮށްދީފައި ވެއެވެ.