ކޮންމެ މަހެއްގެ ވެސް އެއްދުވަހަކީ ވެހިކަލް ދުއްވުން މަނާ ދުަވހެއްގެ ގޮތުގައި ކަނޑައެޅުމުގެ ވިސްނުން ގެންގުޅުއްވާކަމުގައި މާލޭސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރިވާޔާ ނިއުސް އިން ގެނެސްދޭ '28 މިނެޓު' ގައި ވާހަކަ ދައްކަވަމުންނެވެ.

މޭޔަރު ވަނީ އެކަމާއި ގުޅޭ ކަރުދާހެއް ކައުންސިލަށް ހުށަހެޅުމުގެ މަސައްކަތް ކުރައްވާނެކަމަށާއި ނުރަސްމީކޮށް ކައުންސިލަރުންގެ ޚިޔާލު ހޯދާފައިވާނެކަމަށް ވިދާޅުވެފައެވެ. އަދި އެ ޚިޔާލަށް ކައުންސިލަރުން ވެސް ތާއީދު ކުރައްވާ ކަމަށް ވިދާޅުވިއެވެ.

" އެކަން ފެށުމުގެ ގޮތުން އެންމެ ފުރަތަމަ ކަނޑައަޅާނީ ކޮންމެ މަހެއްގެވެސް އެއް ހުކުރު ނުވަތަ ދެ ހުކުރު ދުވަހުން ވަގުތުކޮޅެއް. އެގޮތުން ފުރަތަމަ ހުކުރުގެ ހެނދުނުގެ ވަގުތުކޮޅާއި، ދެވަނަ ހުކުރުގެ ހަވީރުގެ ވަގުތަކީ މާލެ ސިޓީގައި ފައިމަގުގައި އުޅޭ ވަގުތުކޮޅަކަށް ހަދަން ވިސްނުން ހުރީ." މޭޔަރު ވިދާޅުވިއެވެ.

މީގެއިތުރުން މިއީ ކުރީގެ ދިރިއުޅުން ތަޖްރިބާކޮށްލުމުގެ ފުރުސަތު ދިނުމުގެ ވިސްނުމުގައި ކަނޑައަޅުއްވާ ވަގުތުކޮޅެއް ކަމަށާއި މި ވަގުތުކޮޅު ކަނޑައެޅުމުގައި ޓްރެފިކް ފްލޯ އަށް ބާރުބޮޑުނުވެ، އެކަން ކުރެވޭނެ ވަގުތަކަށް ހެދުން މުހިންމު ކަމުގައި ވެސް ވިދާޅުވިއެވެ.

މާލޭގައި އާންމުގޮތެއްގައި އިންޖީނުލީ އުޅަނދު ދުއްވުން މަނާކުރަނީ އީދު ދުވަސްފަދަ ދުވަސްތަކުގައެވެ.