ސްޓެލްކޯގެ ސަބް-ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ތަތްކޮށްފައިވާ އިޝްތިހާރު ފަދަ ތަކެތި ނައްޓައި، ސާފުކުރުމުގެ ހަރަކާތެއް އެ ކުންފުނިން ފަށައިފިއެވެ.

"ޗާލު ވެށި–މަގޭ ޒިންމާ" ގެ ނަމުގައި ފެށި މިހަރަކާތުގައި އެންމެ އިސްކޮށް އެކުންފުނީގެ މެނޭޖިންގ ޑިރެކްޓަރ ޙުސައިން ފަހުމީ ހުންނެވިއިރު، ސްޓެލްކޯގެ މެނޭޖުމެންޓުގެ އިސްބޭފުޅުންނާއި އެންވަޔަރްމެންޓް މިނިސްޓަރ ތާރިގް އިބްރާހިމް އާއި މާލޭ ސިޓީގެ މޭޔަރ އާދަމް އާޒިމް ވެސް ޢަމަލީގޮތުން ހަރަކާތްތެރިވެވަޑައިގަންނަވައެވެ.

މިއީ އެ ކުންފުނީގެ ސަބް-ސްޓޭޝަންތަކާއި ޑިސްޓްރިބިއުޝަން ފޮށިތައް ސާފުކުރުމަށް ސްޓެލްކޯގެ މުވައްޒަފުން އިސްނަގައިގެން ހިންގާ ޕްރޮގްރާމެކެވެ. ބޭނުމަކީ މަތިމައްޗަށް ހިއްޕާފައިވާ އިޝްތިހާރުތަކާއި އެކިކަހަލަ ކަރުދާސްތައް ނައްޓައި، ސާފުކުރުމެވެ.

މީގެއިތުރުން މާލޭގެ ވެއްޓަކީ ރީތި ހިތްފަސޭހަ ވެއްޓަކަށް ހެދުމަށް ފަރުދީ ޒިންމާ އަދާކުރުމަށް ބާރުއެޅުމެވެ.