މޫސުމަށް ސަމާލުވުމަށް މެޓް އޮފީހުން އިލްތިމާސް ކުރައްވައިފިއެވެ.

އެ އިދާރާ އިން ވަނީ ރާއްޖެއަށް މިހާރުކުރަމުންދާ ވިއްސާރާގައި ކަނޑުތައް ގަދަވާނެކަމަށް ލަފާކުރައްވާފައެވެ.

އެހެންވެ، ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް ހާއްސަ ސަމާލުކަމެއް ދިނުމަށް އެދިފައިވާއިރު، އުތުރާއި ދެކުނުގެ ބައެއް ރަށްތަކަށް ގުގުރުމާ އެކު ވިއްސާރަ ކުރާނެ ކަމަށް މޫސުމީ ބުލެޓިންގ ގައި ބުނެފައި ވެއެވެ.

މިއަދު ހަވީރު 6 ޖެހުމާއި ހަމައަށް ނެރެފައިވާ މި ބުލެޓިންގ ގައި ވަނީ މެދުރާއްޖެ ތެރޭގެ އަތޮޅުތަކަށް ކެރީގެ އަސަރު ފޯރާނެ ކަމަށް ވެސް ލަފާކޮށްފައެވެ. އަދި އެ ސަރަހައްދަށް ވައިޖެހޭނެ ކަމަށް ލަފާކޮށްފައިވަނީ ހުޅަނގު އުތުރުން ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރު މިނުގައެވެ.

އެހެން ސަރަހައްދުތަކަށް 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، ވިލާގަނޑުގައި 45 މޭލަށް ވައިގަދަވާނެ ކަމަށް ލަފާކޮށްފައި ވެއެވެ. އަދި ރާއްޖޭގެ ދެކުނުގެ ކަނޑުތައް ގަދަވާނެ ކަމަށާއި އުތުރާއި މެދުރާއްޖެ ތެރޭގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ ކަމަށް މެޓް އޮފީހުން ބުނެއެވެ.

މެޓް އޮފީހުން ބުނީ ދެކުނުގެ ސަރަހައްދުތަކުގައި ރާޅުގެ އުސްމިން ހުންނާނީ 4 ފޫޓާއި 7 ފޫޓާ ދެމެދުގައި ކަމަށާއި އުތުރާއި މެދުރާއްޖެ ތެރޭގެ އަތޮޅުތަކުގެ ކަނޑުތަކުގައި ރާޅުގެ އުސްމިން ހުންނާނެކަމަށް ލަފާކުރަނީ ތިން ފޫޓާއި ހަ ފޫޓާއި ދެމެދުގައި ކަަމަށެވެ.