މީސްމީޑިއާގައި ކުރާ ޕޯސްޓުތަކަށް ފުލުހަށް ހާޟިރުކުރުމާއި ކައުންސިލްތަކަށް އިންޒާރުގެ ސިޓީ ފޮނުވުމަކީ ރައްޔިތުންގެ ބުރަ މަސައްކަތުން ހޯދާފައިވާ ހިޔާލުފާޅުކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމުގައި ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެމްޑީޕީގެ މީސްމީޑިއާ އެކްޓިވިސްޓް ޙުސައިން ޝާފިޢުގެ ޓްވީޓެއްގެ މައްސަލަ ބެލުމަށް ފުލުހަށް ހާޟިރުވުމަށް ޝާފިޢު އަށް އެންގުމާ ގުޅިގެންނެވެ.

ރައީސް ސާލިހު 'އެކްސް' ގައި ކުރައްވާފައިވާ ޕޯސްޓެއްގައި ވަނީ ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައި، އަދަބު ދިނުމުގެ ބިރުވެރި މާޒީ އަލުން އިއާދަކުރަން ސަރުކާރުން މަސައްކަތްކުރާތީ ކަންބޮޑުވުން ފާޅުކުރައްވާ ކަމަށެވެ.

ފުލުހުން ޝާފިޢު އަށް ފޮނުވި ޗިޓުގައި ބަޔާންކޮށްފައިވަނީ ނޮވެމްބަރު 8 ވަނަ ދުވަހުގެ 01:14 ގައި އެކްސް ޕްލެޓްފޯމުގައި ހަޑިހުތުރު ބަހުގެ ބޭނުންކޮށް، ބިރުވެރިކަން އުފެދޭފަދަ ޕޯސްޓެއް ކުރި ކަމަށެވެ.

އެ މައްސަލައާ ގުޅޭގޮތުން ހޯމް މިނިސްޓަރ ޢަލީ އިޙްސާން ވިދާޅުވެފައިވަނީ ޝާފިޢުގެ ޕޯސްޓުގައި "މަށަށް ކަލޭ މަގެއްމަތިން ނުފެއްނާތި" މިހެން ލިޔެފައިވާ ކަމަށާއި، މި ޖުމްލައިން ވަކި ފަރާތަކަށް ނިސްބަތްކޮށް ޖިސްމާނީ ގެއްލުމެއް ދީފާނެކަމުގެ ބިރުދެއްކުމުގެ މާނަ ދޭހަވާތީ، އެކަން ސާފުކުރުމަކީ ކަމާބެހޭ އިދާރާތަކުން ކުރަންޖެހޭ ކަމެއް ކަމަށެވެ.

މި މައްސަލައާ ގުޅިގެން ފާހަގަކޮށްލެވޭ ގޮތުގައި މިދިޔަ ހަފްތާގައި އެލްޖީއޭ އިން ވަނީ ރައީސްގެ އަބުރަށް އަރައިގަތް ކަމަށް ބުނެ ގދ. ގައްދޫ ކައުންސިލްގެ ރައީސްގެ މައްސަލަ ބެލުމަށް އެ ކައުންސިލަށް އަންގާފައެވެ.