މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަގާމުގައި ހުންނެވި ޑރ. ޢާއިޝަތު ރަމީލާގެ ސިއްހީ ހާލުކޮޅު ހުރިގޮތުން މަގާމުން އިސްތުއުފާ ދެއްވައިފިއެވެ.

މިކަމާއިގުޅިގެން ރައީސް ޑރ. މުޙައްމަދު މުޢިއްޒު ނެރުއްވި ބަޔާނުގައި ވަނީ ޑރ. ޢާއިޝަތު ރަމީލާގެ ސިއްހީ ހާލުކޮޅު ހުރިގޮތުން މިނިސްޓަރުގެ މަގާމުން އިސްތިއުފާ ދެއްވުމަށް ހުށަހަޅުއްވާފައިވާތީ، އެކަން ގަބޫލުފުޅުކުރއްވާކަމަށް ވިދާޅުވެފައެވެ.

މީގެއިތުރުން އެކަމަނާ އަލާސްކަންފުޅުގައި އުޅުއްވަމުން ވެސް މިނިސްޓަރުގެ ހައިސިއްޔަތުން ރާއްޖޭގެ ގާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، ރައީސް އަށް ދެއްވި އެއްބާރުލެއްވުމަށް ވަނީ ޝުކުރުއަދާކުރައްވާފައެެވެ.

މީގެއިތުރުން ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ހިދުމަތްތަކަށްޓަކައި ވެސް އިހްޕާސްތެރިކަމާއެކު ޝުކުރުއަދާކުރައްވާފައި ވެއެވެ. އަދި ޑރ. ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ އެމަނިކުފާނަށް ލިބުނު ވަރަށް ބޮޑު އުފަލެއްކަން ފާހަގަކުރައްވާފައި ވެއެވެ.

ހަމަމިއާއެކު ކުރިއަށް އޮތްތާނގައި ވެސް ކަމަނާގެ ހިދުމަތް ދިވެހި ގައުމަށް ލިބޭނެކަން ޔަގީންކުރައްވާ ކަމަށް ވެސް ވިދާޅުވިއެވެ.

ރައީސް ޑރ. މުޢިއްޒު ވަނީ ޑރ. ޢާއިޝަތު ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި މާތްﷲ ގެ ތަނަވަސް ރަޙުމަތްފުޅުން އެކަމަނާ އަށް އަވަސް އަދި ދާއިމީ ޝިފާއެއް މިންވަރު ކުރައްވައި، އަދަށްވުރެ އުފާވެރި ފާގަތި މުސްތަގްބަލެއް މިންވަރުކުރެއްވުމަށް ދުއާ ކުރައްވާފައެވެ.