ހަޔަރ އެޑިއުކޭޝަން މިނިސްޓްރީގެ ބައެއް އިސްބޭފުޅުން، މެލޭޝިޔާގައި ކުރިއަށްދިޔަ، "ފެސްޓިވަލް އައިޑިޔާ ޕުޓްރަޖާޔާ" ގައި ބައިވެރިވެވަޑައިގަންނަވައިފިއެވެ.

މި ފެސްޓިވަލްގައި ބައިވެރިވުމުގެ ފުރުޞަތު އެ މިނިސްޓްރީއަށް ލިބިފައިވަނީ އެޑިޔުކޭޝަން މެލޭޝިޔާ ގްލޯބަލް ސަރވިސެސް (އީއެމްޖީއެސް) ގެ ދައުވަތަކަށް މެލޭޝިޔާއަށް ކުރެވުނު ދަތުރުގެ ތެރެއިންނެވެ.

މަތީ ތައުލީމީ ދާއިރާގައި މަސައްކަތް ކުރައްވާ އިސް ބޭފުޅުންނާއި، އެކި ޤައުމުތަކުން މެލޭޝިޔާގައި މަތީ ތައުލީމު ހާސިލުކުރަމުންދާ ދަރިވަރުން ބައިވެރިވާ، "ފެސްޓިވަލް އައިޑިޔާ ޕުޓްރަޖާޔާ" ގައި މިނިސްޓްރީގެ ފަރާތުން ބައިވެރިވެވަދައިގެންނެވީ ސްޓޭޓް މިނިސްޓަރ ޑރ. ޢަބްދުލް ރަޙީމް ހަސަން، ޑެޕިއުޓީ މިނިސްޓަރ، އައިމިނަތު ނަދާ މުޙައްމަދު، ނޭޝަނަލް ކެރިޔަރ ސަރވިސެސް (އެންސީއެސް) ގެ ފަރާތުން ޑެޕިއުޓީ މިނިސްޓަރ، ޝަހީދާ ޢަލީ އަދި މޯލްޑިވިސް ކޮލިފިކޭޝަންސް އޮތޯރިޓީ (އެމްކިޔުއޭ) ގެ ސީއީއޯ، މަރްޔަމް ފިޒާނާ ރަޝީދު އެވެ.

މިނިސްޓްރީގެ އިސް ބޭފުޅުން ވަނީ މެލޭޝިޔާގެ އެކި ޔުނިވާސިޓީތަކުގައި މަތީ ތައުލީމު ހާސިލުކުރަމުންދާ ދިވެހި ދަރިވަރުންނާއި ބައްދަލުކޮށް، އެ ދަރިވަރުނަށް ދިމާވާ އުނދަގޫތަކާއި ކަންބޮޑުވުންތައް އޮޅުންފިލުވާފައެވެ. އަދި މިނިސްޓްރީގެ ފަރާތުން ފޯރުކޮއްދެވެން ހުރި އެހީއާއި އެއްބާރުލުމާއި ގުޅިގެން ވެސް މަޝްވަރާކޮއްފައި ވެއެވެ.