ކުނި މެނޭޖުކުރުމުގެ ދާއިރާއިން އީޖާދީ މަސައްކަތްތަކެއް ކުރަމުންއަންނަ ޖަމަޢިއްޔާ، ސޮނެވޭ ނަމޫނާ އިފްތިތާހުކުރިތާ 6 އަހަރު ފުރުން ފާހަގަކޮށްފިއެވެ.

މިކަން ފާހަގަކުރީ ނ. އަދި ބ. އަތޮޅުގެ އެގާރަ ކައުންސިލެއްގެ ބައިވެރިވުމާއެކު، ސޮނެވާފުށީގައެވެ.

ކައުންސިލުތަކާއި ގުޅިގެން ސޮނެވާ ނަމޫނާ އިން ކުރާ މަސައްކަތުން ރަށު ފެންވަރުގައި ތިމާވެއްޓާ ރައްޓެހި، ދެމެހެއްޓެނިވި ގޮތެއްގައި ކުނި މެނޭޖުކުރެވޭނެގޮތްތައް ފަހިވެ، ހާމައަށް ކުނިއެންދުން ފަދަ ގެއްލުންދެނިވި ކަންކަން މި ޕްރޮގްރާމުގެ ސަބަބުން ވަނީ މަދުކޮށްފައެވެ.

މިގޮތުން ރަށްރަށުގައި ސިންގްލް ޔޫސް ޕްލާސްޓިކް ބޭނުންކުރާ މިންވަރު މަދުކުރުމަށް ހާއްސަ މަސައްކަތްތަކެއްކޮށް، ވަށައިގެންވާ ކަނޑުގެ މާހައުލަށް އާންމު ރައްޔިތުން ކުރާ ލޯބި އާލާކުރުމަށްމައިގަނޑު 5 ފިޔަވެއްސެއް ހިމެނޭ ކުނި މެނޭޖްކުރުމުގެ މޮޑެލްއެއް ތައާރަފްކޮށް ވަނީ ތަންފީޒުކުރަންފަށާފައެވެ.

މިގޮތުން ކައުންސިލްތަކާއި، ސޮނެވާ ނަމޫނާއާއި އެހެން ޕާޓްނަރުން ގުޅިގެން ކުރި މަސައްކަތުން އެއް މިލިއަން ސިންގްލް ޔޫސް ޕްލާސްޓިކް ފުޅި އަންދާލުމުން ނުވަތަ ކަނޑަށް ކުނީގެ ގޮތުގައި އެޅުން ހުއްޓުވާފައި ވެއެވެ. މިކަން ކުރެވުނީ ސޮނެވާ ވޯޓަރ އިން ބިއްލޫރި ފުޅީގައި އަދި ރީޔުސަބަލް ކޮންޓެއިނަރުގައި ބަންދުކުރާ ފެނުގެ 500،000 ލީޓަރު ފެން ރަށްތަކުގައި ބޭނުންކޮށްގެނެވެ.

މީގެއިތުރުން އިންފްރާސްޓަކްޗަރ، ލޮޖިސްޓިކްސް އަދި ފަންނީ އެހީ ގެތަރެއިން ނ. އަދި ބ. އަތޮޅުގައި އުފެދުނު 800 ޓަނުގެ ކުނިވަނީ ހާމައަށް އަންދުމުން ނުވަތަ ކުނީގެ ގޮތުގައި ކަނޑަށް އެޅިގެން ދިޔުން ވެސް ވަނީ ހުއްޓިފައެވެ.

ހަމަމިއާއެކު 500 ޓަނުގެ ތަކެތިވަނީ ރީސައިކްލް ކުރުމަށް ފޮނުވާފައިވާއިރު، މިކަމުން ދައްކުވައިދެނީ ދެމެހެހެއްޓެނިވި ގޮތެއްގައި ކުނި މެނޭޖުކުރުމަށް މުޖުތަމަޢުން ބޭނުންވާ މިންވަރެވެ. އަދި ދިރިއުޅުމުގެ ވައްޓަފާޅި ބަދަލުކުށް ތިމާވެއްޓަށް ކުރާ ލޯތްބާއި އިހްތިރާމް އާލާކުރުމަށް ހިންގުނު އެކިއެކި ތަމްރީނުތަކާއި އެހެނިހެން އެންގޭޖްމަންޓްތަކުގައި 6،000 ފަރާތެއްގެ ބައިވެރިވުން ހިމެނެއެވެ.