ބޭންކް އޮފް މޯލްޑިވްސް (ބީއެމްއެލް) އަށް އޭޓީއެމް ސަޕްލައިކޮށްދޭނެ ފަރާތެއް ހޯދަން އިއުލާނުކޮށްފިއެވެ.

އެ ބޭންކުން ކޮށްފައިވާ އިއުލާނެއްގައި ވަނީ 65 އޭޓީއެމް ބޭނުންވާ ކަމަށާއި އެތަކެތި ފޯރުކޮށްދިނުމަށް ބޭނުންވާ ފަރާތްތަކަށް އަންދާސީ ހިސާބު ހުށަހެޅުމުގެ ފުރުސަތު ޑިސެމްބަރ މަހުގެ 19 ވަނަ ދުވަހާ ހަމަޔަށް ހުޅުވާލާފައިވާ ކަމަށެވެ.

މީގެއިތުރުން އެކަމާއިގުޅުން ހުރި މައުލޫމާތު ސާފު ކުރުމުގެ ފުރުސަތު މި މަހުގެ 5 ވަނަ ދުވަހާއި ހަމައަށް ހުޅުވާލާފައިވާ ކަމަށާއި އަންދާސީ ހިސާބު ހުށަހެޅުން ކުރިޔަށް ގެންދަން ނިންމާފައިވަނީ ބީއެމްއެލްގެ ހެޑް އޮފީހުގައި ކަމަށް ވެސް އެ ބޭންކުން ބުނެއެވެ.

އެ ބޭންކުން އޭޓީއެމް ގަންނަން އިއުލާކޮށްފައިވާއިރު، ރާއްޖޭގެ ހުރިހާ ރަށަކަށް ބީއެމްއެލްގެ އޭޓީއެމް ހިދުމަތް ފޯރުކޮށްދިނުމަށް އެ ބޭންކާއި ދިވެހި ސަރުކާރުން ވަނީ މަޝްރޫއެއް އިފްތިތާހުކޮށްފައެވެ. އެއީ މިދިޔަ ނޮވެމްބަރު މަހުގެ 7 ވަނަ ދުވަހުއެވެ.

މިވަގުތު ރާއްޖޭގައި ބީއެމްއެލް ގެ 190 އޭޓީއެމް ގާއިމްކޮށްފައިވެއެވެ. އަންނަ 2025 ނިމުމުގެ ކުރިން ރާއްޖޭގައި 250 އަށްވުރެ ގިނަ އޭޓީއެމް ގާއިމުކުރުމަށް ބީއެމްއެލްއިން ވަނީ މަސައްކަތް ފަށާފައެވެ.