މޯލްޑިވްސް އިމިގްރޭޝަނުން މިހާރުކުރިއަށްގެންދާ ހާއްސަ އޮޕަރޭޝަންގައި އިތުރު 14 ބިދޭސީން އެ އިދާރާގެ ބެލުމުގެ ދަށަށް ގެންގޮސްފިއެވެ.

އެ އިދާރާ އިން ވިދާޅުވީ ޑިސެމްބަރ 1 ވަނަ ދުވަހުގެ ރޭ ކުރިއަށްގެންދިޔަ އޮޕަރޭޝަންގައި އާންމު ސިއްހަތަށް ގެއްލުވާގޮތަށް ހުޅުމާލޭގައި ބިދޭސީން ދިރިއުޅެމުންދާ ދެ އެކޮމޮޑޭޝަން ބްލޮކެއް ބަލައި ފާސްކޮށްފައިވާ ކަމަށެވެ.

އެގޮތުން ފުރަތަމަ ތަނުން ގަވާއިދާ ހިލާފަށް އުޅެމުންދިޔަ ބިދޭސީ ނުވަ ފިރިހެނުން އަދި ދެވަނަ ތަނުން ބިދޭސީ ތިން އަންހެނަކާއި ދެ ފިރިހެނުން ހިމެނޭހެން ޖުމްލަ 14 ބިދޭސީން އެ އިދާރާގެ ބެލުމުގެ ދަށަށް ގެނެވިފައިވާ ކަމަށް ވިދާޅުވިއެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ފައްޓާފައިވާ ހާއްސަ އޮޕަރޭޝަންގައި ކޮންމެދުވަހަކު ކަހަލަގޮތަކަށް ގެންދަނީ ތަންތަން ބަލައި، ފާސްކުރަމުންނެވެ. އަދި ގަވާއިދާ ހިލާފަށް އުޅޭ ބިދޭސީން އެ އިދާރާގެ ބެލުމުގެ ދަށަށް ގެންނަމުން ވެސް ދެއެވެ.

މީގެއިތުރުން ބައެއް ބިދޭސީން ރާއްޖެ ނާދެވޭގޮތަށް ޑީޕޯޓު ވެސް ކުރަމުން ދެއެވެ.