އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓް (އޭ.ޕީ.އާރް.އެފް.އެޗް.އީ) ގެ މެންބަރު ގައުމެއްގެ ގޮތުގައި ރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފިއެވެ.

ޑިސެމްބަރު 1 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާއިން މި ގޮތަށް ނިންމަވާފައިވަނީ، މިނިސްޓްރީ އޮފް ހެލްތުގެ ހުށައެޅުމަކާ ގުޅިގެންނެވެ.

އޭ.ޕީ.އާރް.އެފް.އެޗް.އީގެ މެންބަރަކަށް ވުމުން ރާއްޖެއަށް ކުރާނެ ފައިދާތަކުގެ ތެރޭގައި، ފޯރަމްގެ މެމްބަރު ޤައުމުތަކާ ގުޅުން ބަދަހިވެ، ސިއްހަތާއި ތިމާވެއްޓާ ގުޅުންހުރި ސިޔާސަތުތަކާއި ގައުމީ ޕްލޭންތައް އެކުލަވާލުމާއި ތަންފީޒުކުރުމަށް ސަރަޙައްދީ އެއްބާރުލުން ލިބޭނެއެވެ. އަދި ރާއްޖޭގެ ތިމާވެއްޓާއި ސިއްހަތަށް ކުރާ ނޭދެވޭ އަސަރުތައް ކުޑަކުރުމަށް ވަކާލާތު ކުރުމާއި، ސަރަހައްދީގޮތުން އެކުގައި މަސައްކަތް ކުރުމުގެ ފުރުސަތުލިބުން ހިމެނެއެވެ.

މީގެއިތުރުން ސިއްހީ އަދި ތިމާވެށީގެ ދާއިރާއިން ހިދުމަތްދިނުމުގައި ޑިޖިޓަލް ހެލްތު ބޭނުންކުރުމުގެ ލުއިފަސޭހަކަން ލިބި ފަންނީ އެހީތެރިކަން ހޯދުމަށް މަގުފަހިވެގެންދާނެއެވެ. އަދި ފޯރަމްގެ ނޮލެޖު ނެޓްވަރކްގެ ޒަރިއްޔާއިން ދިރާސީ މަސައްކަތްތަކަށް އެހީތެރިކަން ލިބި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި މޫސުމަށް އަންނަ ބަދަލުތަކުގެ ސަބަބުން އާންމު ސިއްހަތަށް ހުރި ނުރައްކާތައް ވަޒަންކޮށް މިންކުރުމާއެކު މި ދެ ދާއިރާއިން އެއް މަންސައެއްގައި، ވަށާޖެހޭގޮތަކަށް ލަނޑުދަނޑި ހާސިލުކުރުމަށް މަސައްކަތްކުރެވި، ފަންނީ ތަމްރީނުތައް ހޯދުމުގެ ފުރުސަތު ބޮޑުވެ، މި ކަމަށް ބާރުއެޅޭނެއެވެ.

އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓަކީ، ތިމާވެއްޓަށް އަންނަ ބަދަލުތަކުގެ ސަބަބުން އިންސާނުންގެ ސިއްޙަތަށް ކުރިމަތިވެފައިވާ ނުރައްކާތައް ހައްލުކުރުމުގެ ގޮތުން 2004 ވަނަ އަހަރު އެކުލަވާލި ފޯރަމެކެވެ. ގައުމުތަކުން މި ފޯރަމުގައި ބައިވެރިވަނީ ވޮލަންޓަރީކޮށެވެ. މި ފޯރަމުގައި ބައިވެރިވުމުން، މި ފޯރަމްގެ ތެރެއިން އިންތިޒާމުކުރާ ތީމެޓިކް ވަރކިންގް ގްރޫޕްތަކުގައި އެކި ދާއިރާތަކުން މަސައްކަތްކުރުމުގެ ފުރުސަތާއި ގައުމުން ފޯރަމްގެ ޗެއަރމަންޝިޕް އަދާކުރުމުގެ ފުރުސަތު ލިބިގެންދާނެއެވެ.

މި ފޯރަމްގެ މަގްސަދަކީ، ސަރަހައްދީ އަދި ގައުމީ ފެންވަރުގައި ސިއްހީ ދާއިރާއާއި ތިމާވެށީގެ ދާއިރާތަކުގެ މެދުގައި އެއްބާރުލުން ދިނުމުގެ މަންސައެއް މެދުވެރިކޮށްދިނުމާއި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި، މޫސުމަށް އަންނަ ނޭދެވޭ ބަދަލުތަކުން އާންމު ސިއްހަތަށް ހުރި ނުރައްކާތައް ކުޑަކުރުމަށް ގައުމުތަކުން އަޅަންޖެހޭ ފިޔަވަޅުތަކާއި، ސިޔާސަތުތަކާއި ކުރަންޖެހޭ މަސައްކަތްތަކާ ގުޅޭގޮތުން ވަކާލާތުކުރުމާއި، ދެމެހެއްޓެނިވި ތަރައްގީގެ ލަނޑުދަނޑިތައް، ޕެރިސް އެގްރީމަންޓް، ނެޝަނަލީ ޑިޓަރމައިންޑް ކޮންޓްރިބިއުޝަން، މިނަމާޓާ ކޮންވެންޝަންސް އަދި ގްލޯބަލް ބަޔޯޑައިވަރސިޓީ ފްރޭމްވަރކްގެ މައިގަނޑު އަސާސްތަކާ އެއްގޮތްވާގޮތުގެ މަތިން ތިމާވެށި ހިމާޔަތްކޮށް، އާންމު ސިއްހަތު ރައްކާތެރިކުރުމަށްޓަކައި ދަތުރުފަތުރާއި، ތައުލީމާއި، ހަކަތަ އާއި، ވިޔަފާރީގެ ދާއިރާ ފަދަ އެހެނިގެން ދާއިރާތައް ކުރިއެރުވުމެވެ.

މި ފޯރަމުގައި ބައިވެރިވުމުން ދައުލަތުން އަދި އާންމު ފަރުދުން އެއްވެސް އިލްތިޒާމެއް އުފުލާކަށް ނުޖެހޭނެއެވެ.