ބައިނަލްއަގްވާމީ ނުކުޅެދުންތެރިކަން ހުންނަ ފަރާތްތަކުގެ ދުވަސް ފާހަގަކުރުމަށް ވީލްޗެއަރ އެސޯސިއޭޝަން އޮފް މޯލްޑިވްސް އާއި ވާސޯ މެޑިކަލް ސެންޓަރ ގުޅިގެން ހާއްސަ ހަރަކާތެއް ބޭއްވުމަށް ނިންމައިފިއެވެ.

'އޮއިވަރު' އަށް މައުލޫމާތު ދެއްވަމުން ވާސޯ މެޑިކަލް ސެންޓަރުން ބުނީ މި ހަރަކާތް ބޭއްވުމަށް ނިންމާފައިވަނީ ޑިސެމްބަރ 3 ވާ އަންގާރަ ދުވަހުގެ (މާދަމާ) ކަމަށެވެ. އަދި ހަރަކާތް އޮންނާނީ ހުޅުމާލޭ ފޭސް 2 ގެ "ހިޔާ ޕާކު" ހިޔާޓަވަރު 7 ކައިރީގައި ކަމަށެވެ.

ވީހާވެސް ގިނަ މިފަދަ ކުދިންނާއި މީހުންނާއި ބެލެނިވެރިންނާއެކު އާއިލާގެ ކުޑަކުދިން މި ހަވީރުގައި ބައިވެރިވުމަކީ ވަރަށްބޮޑު އެދުމެއް ކަމަށް އެ ދެ ފަރާތުން ވަނީ ހާމަކޮށްފައެވެ. ހާއްސަކޮށް ވާސޯ ކްލިނިކްގެ ޑިސްއެބިލިޓީސް ވެލްފެއަރ ޕޭޝަންޓްސް، ރަޖިސްޓްރޭޝަން ކާޑު ލިބިފައިވާ ކުދިންނާއި ބެލެނިވެެރިން މި ހަވީރުގައި ބައިވެރިވުމަށް ވަނީ އެދިފައެވެ.

މި ހަވީރަކީ ނުކުޅެދުންތެރިކަން ހުންނަ ފަރާތްތަކަށާއި އެފަރާތްތަކުގެ ބެލެނިވެރިންނަށް ވެސް ވަރަށް މުހިއްމު ހަވީރެއްކަން ފާހަގަކުރިއެވެ. އަދި މި ހަވީރުގައި ބައިވެރިވާ ނުކުޅެދުންތެރިކަން ހުންނަ ހުރިހައި ކުދިންނަށާއި އެކުގައި އަންނަ އާއިލާގެ ކުޑަ ކުދިންނަށް ވެސް ހަދިޔާ ލިބޭނެ ދިނުމަށް ނިންމާފައިވާކަމަށް އެ ފަރާތުން ހާމަކުރިއެވެ.

ވާސޯ ކްލިނިކްގެ މިހައިތަނަށް ވަނީ ރަޖިސްޓްރީވެފައިވާ 70 އަށްވުރެ ގިނަ، ނުކުޅެދުންތެރި ހުންނަ ފަރާތްތައް ރަޖިސްޓްރީކޮށްފައެވެ. އެހެންކަމުން އެފަރާތުން ގެންދަނީ ފަރާތްތަކަށް އެންމެ ބޭނުންވެފައިވާ އެހީތެރިކަމާއި އަޅާލުން ދެނެގަތުމަށް ގިނަގުނަ މަސައްކަތްތަކެއް ކުރަމުންނެވެ.

އެ ކްލިނިކުގެ ހިދުމަތް ހުޅުމާލޭގައި ދޭން ފެށުމުން ކްލިނިކުން ދޭ ހުރިހައި ހިދުމަތެއް އެފަރާތްތަކަށް މުޅިން ހިލޭ ތައާރަފް ކުރުމަށް ވަނީ ނިންމާފައެވެ. އަދި އެފަރާތްތަކަށް ހާލަތު ރަނގަޅު ކުރުމަށް ކޮށްދެވިދާނެ ކަންކަމާ ވާހަކަ ދެއްކުމަށް ވެސް ވަނީ ނިންމާފައެވެ.

ވީލްޗެއަރ އެސޯސިއޭޝަން އޮފް މޯލްޑިވްސް އަކީ ޔޫތް މިނިސްޓްރީގައި ރަޖިސްޓްރީކޮށްގެން ހިންގަމުން އަންނަ ޖަމިއްޔާއެކެވެ. އެ ޖަމިއްޔާގެ ހިންގާ ކޮމެޓީއަށް މެމްބަރުން އިންތިހާބުކޮށްފައިވަނީ ނޮވެމްބަރ 15 ވީ ހުކުރު ދުވަހުއެވެ.

ހުޅުމާލޭ ސަލާޙުއްދީން ސްކޫލުގައި ބޭއްވި ހަފުލާއެއްގައި ޗެއަރޕާރސަންއަކަށް އަޙްމަދު ނަޖީބު އިންތިހާބުކުރިއިރު، ވައިސް ޗެއަރޕާރސަން އަކަށް އިންތިހާބުވީ ޙައްވާ މިޒުނާއެވެ. ސެކްރެޓަރީ ޖެނެރަލްގެ މަގާމަށް އިންތިހާބުކުރީ އަޙްމަދު ޢަބްދުﷲ އެވެ. ޓްރެޝަރަރގެ މަގާމަށް އަޙްމަދު ޖަމޫމް ޖާން ޝާހު އަދި މީޑިއާ ކޯޑިނޭޓަރއަކަށް ޢަބްދުލް ބާއިސް ޢަލީ ވަނީ އިންތިހާބުކޮށްފައެވެ.

ވާސޯ މެޑިކަލް ސެންޓަރުން 'އޮއިވަރު' އަށް މައުލޫމާތު ދެމުން ބުނީ އެ ސެންޓަރަކީ ހާއްސަ އެހީއަށް ބޭނުންވާ ފަރާތްތަކަށް ހިލޭ ސާބަހަށް ބޭސްފަރުވާގެ ގިނަ ކަންތައްތަކެއް މިހާރުވެސް ކޮށްދެމުން އަންނަ ތަނަކަށްވާއިރު، ވީލްޗެއަރ އެސޯސިއޭޝަނާއެކު މުސްތަގުބަލުގައި އިތުރުކަންކަން ކުރުމަށް ތާވަލުކުރަމުން އަންނަކަމަށެވެ.

ވީލްޗެއަރ އެސޯސިއޭޝަން ވުޖޫދުވީ ހާއްސަ އެހީ އަށް ބޭނުންވާ ފަރާތްތަކުގެ ތެރޭގައި ހިމެނޭ ބަލި ހާލަތުގެ ގޮތުން އަމިއްލައަށް ހިނގާ އުޅުމުން މަހްރޫމްވެފައިވާ، ވީލްޗެއަރ ގައި އުޅޭ ފަރާތްތަކަށް އެކިގޮތްގޮތުން އެހީތެރިކަންދީ ހައްގުތައް ހޯދައިދިނުމަށް މަސައްކަތްކުރުމަށްޓަކައެވެ.